శిక్షణ తరగతులు క్షేత్రస్థాయి అమలకు కృషి చేయాలి

గుర్ల, సూర్య : అంగన్వాడి కేంద్రాలలో శిక్షణా తరగతుల పాఠాలను క్షేత్రస్థాయిలో అమలకు ప్రతి ఒక్కరు కృషి చేయాలని సిడిపిఓ ఆరుద్ర అంగన్వాడీ కార్యకర్తలకు సూచించారు. బుధవారం స్థానిక మండల పరిషత్ కార్యాలయంలో ‘పోషణ్ భీ పఢాయి భీ’  శిక్షణ కార్యక్రమంలో ఆమె పాల్గొని కార్యకర్తలకు శిక్షణ తరగతులు అంశాలపై వివరించారు. ఈ సందర్భంగా ఆమె మాట్లాడుతూ  శిక్షణ తరగాతి అంశాలను అంగన్వాడీ కేంద్రాల్లో సమర్థవంతంగా అమలు చేయాలని కార్యకర్తలకు సూచించారు. పిల్లల ఎదుగుదల పర్యవేక్షణ, పోషణ్ ట్రాకర్ వినియోగం, ప్రీ స్కూల్ బోధనా పద్ధతులపై ప్రత్యేక అవగాహన కల్పించారు.చిన్నారుల ప్రాథమిక వికాసం, ఆటపాటల ద్వారా విద్యాబోధన, ఎత్తు, బరువు కొలతలు, పోషకాహార లోపాల గుర్తింపు, డిజిటల్ సేవలు, దివ్యాంగ పిల్లల గుర్తింపు, రిఫరల్ విధానాలపై ఆచరణాత్మక శిక్షణ అందించారు. శిక్షణ ద్వారా పొందిన పరిజ్ఞానాన్ని క్షేత్రస్థాయిలో వినియోగించి చిన్నారులకు మెరుగైన సేవలు అందించాలని సూచించారు. కార్యక్రమంలో అంగన్వాడి సూపర్వైజర్ లు నారాయణమ్మ కార్యకర్తలు తదితర సిబ్బంది పాల్గొన్నారు.