సబ్ ట్రెజరీ కార్యాలయంలో ఏసీబీ తనిఖీలు

జంగారెడ్డిగూడెం సబ్‌ ట్రెజరీ కార్యాలయంలో ఏసీబీ తనిఖీలు

-- రికార్డులు స్వాధీనం చేసుకుని సిబ్బంది విచారణ

జంగారెడ్డిగూడెం,మేజర్ న్యూస్ : సబ్‌ ట్రెజరీ కార్యాలయంలో ఏసీబీ అధికారులు గురువారం ఆకస్మికంగా తనిఖీలు నిర్వహించారు. ఓ మహిళ తన తల్లికి రావాల్సిన గ్రాట్యుటీ, పెన్షన్‌ సొమ్ముకు సంబంధించిన వ్యవహారంలో సబ్‌ ట్రెజరీ అధికారులను పలుమార్లు సంప్రదించినట్లు సమాచారం. ఈ సొమ్ము నుంచి తనకు రావాల్సిన మొత్తాన్ని ఇప్పించేందుకు అధికారులు రూ.2.50 లక్షలు లంచం డిమాండ్‌ చేసినట్లు ఆమె ఏసీబీ అధికారులకు ఫిర్యాదు చేసినట్లు తెలిసింది.లంచం ఇచ్చేందుకు ఇష్టపడని సదరు మహిళ ఏలూరు ఏసీబీ అధికారులను ఆశ్రయించినట్లు సమాచారం. దీంతో ఏలూరు ఏసీబీ డీఎస్పీ జి.వి. కృష్ణారావు ఆధ్వర్యంలో ఇన్‌స్పెక్టర్లు ఎం. బాలకృష్ణ, శ్రీనివాస్‌ తదితరులు గురువారం మధ్యాహ్నం జంగారెడ్డిగూడెం సబ్‌ ట్రెజరీ కార్యాలయానికి చేరుకుని ఆకస్మిక తనిఖీలు చేపట్టారు.ఈ సందర్భంగా కార్యాలయంలోని పలు రికార్డులను పరిశీలించడంతో పాటు కొన్ని రికార్డులను స్వాధీనం చేసుకున్నట్లు తెలిసింది. ఏటీవో చంద్రయ్య, ఎస్టీవో చిన్నబాబు, సీనియర్‌ అకౌంటెంట్‌, ఇతర సిబ్బందిని ఏసీబీ అధికారులు విచారించి వారి వాంగ్మూలాలను నమోదు చేసినట్లు సమాచారం.తనిఖీల అనంతరం మీడియా ప్రతినిధులు ఏసీబీ డీఎస్పీ జి.వి. కృష్ణారావును వివరాలు అడగ్గా, ప్రస్తుతం ఈ విషయంపై తాను వివరాలు వెల్లడించలేనని తెలిపారు. విజయవాడలోని ఏసీబీ కార్యాలయం నుంచి మీడియాకు అధికారిక సమాచారం అందిస్తారని పేర్కొన్నారు.

 కె.వి.రమణరావు జంగారెడ్డిగూడెం రిపోర్టర్