రైతులకు, మహిళలకు కూటమి ప్రభుత్వమే కొండంత అండ : ఎమ్మెల్యే కోళ్ల

​లక్కవరపు కోట, సూర్య : రైతాంగాన్ని అన్ని విధాలా ఆదుకోవడమే కాకుండా, మహిళలను పారిశ్రామికవేత్తలుగా తీర్చిదిద్దడమే కూటమి ప్రభుత్వ ధ్యేయమని స్థానిక శాసనసభ్యురాలు కోళ్ల లలితకుమారి స్పష్టం చేశారు. ఎల్.కోట మండల కేంద్రంలో డీఆర్‌డీఏ (DRDA) ఆధ్వర్యంలో ఏర్పాటు చేసిన ‘కస్టమ్ హైరింగ్ సెంటర్’ (వ్యవసాయ సాగు యంత్రాల కేంద్రం)ను ఆమె ప్రారంభించారు. ఈ సందర్భంగా రైతుల వినియోగం కోసం అందుబాటులో ఉంచిన వ్యవసాయ పరికరాలను ఆమె పరిశీలించారు.
​ఈ సందర్భంగా ఏర్పాటు చేసిన సభలో ఎమ్మెల్యే లలితకుమారి మాట్లాడుతూ, గత ప్రభుత్వ హయాంలో రైతులు, డ్వాక్రా మహిళలు తీవ్ర నిర్లక్ష్యానికి గురయ్యారని మండిపడ్డారు. గత ఐదేళ్ల పాలనలో అన్నదాతలకు కనీస వ్యవసాయ పనిముట్లు అందించకుండా మొండిచేయి చూపించారని విమర్శించారు. రోటావటర్లు, డ్యామ్‌సెట్లు, వరి కోత యంత్రాలు, పవర్ స్ప్రేయర్లు, కనీసం ట్రాక్టర్ ట్రాలీలు కూడా రైతులకు అందించిన దాఖలాలు లేవన్నారు. స్త్రీనిధికి నిధులు కేటాయించకుండా, సెర్ప్ (SERP) వ్యవస్థను నిర్వీర్యం చేస్తూ మహిళా సంఘాలను పూర్తిగా అణచివేశారని ఆమె ఆవేదన వ్యక్తం చేశారు.
​కూటమి ప్రభుత్వం అధికారంలోకి వచ్చిన ఈ ఐదు నెలల కాలంలోనే సెర్ప్, వెలుగు విభాగాల ద్వారా గ్రామీణ మహిళా వికాసానికి అనేక నూతన కార్యక్రమాలకు శ్రీకారం చుట్టామని ఎమ్మెల్యే తెలిపారు. మహిళల పొదుపును పెంచుతూ, తక్కువ వడ్డీతో బ్యాంక్ రుణాలు అందించి చిన్న చిన్న పరిశ్రమలు, వ్యాపారాలు స్థాపించేలా ప్రోత్సహిస్తున్నామని పేర్కొన్నారు. తద్వారా గ్రామీణ మహిళలను పారిశ్రామికవేత్తలుగా తీర్చిదిద్దేందుకు ప్రభుత్వం నిరంతరం కృషి చేస్తోందన్నారు. పేదింటి పిల్లల ఉన్నత చదువులకు సెర్ప్ ద్వారా చేయూతనివ్వడంతో పాటు, రాష్ట్రంలో మహిళల భద్రత కోసం ప్రత్యేక రక్షణ వింగ్‌ను కూడా ఏర్పాటు చేసి ప్రభుత్వం భరోసా కల్పించిందని చెప్పారు.
​రైతుల సంక్షేమానికి పెద్దపీట వేస్తున్న కూటమి ప్రభుత్వం సేంద్రీయ వ్యవసాయం, బిందు సేద్యం (డ్రిప్ ఇరిగేషన్) విస్తరణకు ప్రాధాన్యత ఇస్తోందని వివరించారు. ప్రజల ఆరోగ్యాన్ని కాపాడేందుకు రసాయనాలు లేని పంటలతో పాటు కొర్రలు, జొన్నలు, రాగులు, సజ్జలు వంటి చిరుధాన్యాల (మిల్లెట్స్) సాగును ప్రభుత్వం విశేషంగా ప్రోత్సహిస్తోందని తెలిపారు. ఆధునిక వ్యవసాయ పరికరాలను కస్టమ్ హైరింగ్ సెంటర్ ద్వారా సద్వినియోగం చేసుకొని రైతులు సాగు వ్యయాన్ని తగ్గించుకోవాలని ఆమె సూచించారు. ఈ కార్యక్రమంలో స్థానిక ప్రజాప్రతినిధులు, డీఆర్‌డీఏ అధికారులు, డ్వాక్రా సంఘాల ప్రతినిధులు, రైతులు పెద్ద సంఖ్యలో పాల్గొన్నారు.

రిపోర్టర్ : గోవింద్, ఎల్ కోట, విజయనగరం జిల్లా.