రాష్ట్ర పోటీల్లో జయకేతనం ఎగురవేయండి

* సాఫ్ట్ బాల్ అసోసియేషన్  రాష్ట్ర ప్రధాన కార్యదర్శి సూర శ్రీనివాసరావు పిలుపు

* రాష్ట్రస్థాయి పోటీలకు వైయస్సార్ కడప జిల్లా పయనమైన జిల్లా జట్లు 
* క్రీడాకారులకు కోచ్ లకు క్రీడా దుస్తులను సమకూర్చి, పంపిణీ చేసిన సూర శ్రీను 
 

శ్రీకాకుళం 

రాష్ట్రస్థాయి సాఫ్ట్ బాల్ ఛాంపియ పోటీల్లో సమిష్టిగా రాణించి విజయదుందుభి మోగించాలని సాఫ్ట్‌ బాల్ అసోసియేషన్ ఆంధ్రప్రదేశ్ రాష్ట్ర ప్రధాన కార్యదర్శి, జిల్లా ప్రధాన కార్యదర్శి సూర శ్రీనివాసరావు పిలుపునిచ్చారు. వైయస్సార్ కడప జిల్లా పుల్లంపేట వేదిక ఈనెల 13 నుంచి 15వ తేదీ వరకు జరగనున్న ఆంధ్రప్రదేశ్ రాష్ట్రస్థాయి జూనియర్స్ బాల బాలికల సాఫ్ట్‌ బాల్ ఛాంపియన్ షిప్ -2026 పోటీల్లో పాల్గొనే శ్రీకాకుళం జిల్లా జట్లు ఆదివారం సాయంత్రం ఇక్కడి నుంచి పయనమై వెళ్లాయి. ఈ సందర్భంగా శ్రీకాకుళం కోడి రామ్మూర్తి స్టేడియం వద్ద జరిగిన వీడ్కోలు కార్యక్రమంలో జిల్లా డి.ఎస్.డీ.ఓ. ఏ.మహేష్ బాబుతో కలిసి సూర శ్రీను మాట్లాడుతూ దశాబ్దంన్నర కాలంగా సాఫ్ట్ బాల్ లో శ్రీకాకుళం జట్లు అత్యద్భుతమైన ఆటతీరును, ఫలితాలను  సాధిస్తున్నాయని చెప్పడానికి గర్వకారణంగా ఉందన్నారు. అదే స్ఫూర్తిని కొనసాగించి జిల్లా జట్లు విజేతలుగా నిలవాలని వారు ఆకాంక్షించారు.

శిక్షణా శిబిరాలు నిర్వహించి తీర్చిదిద్దాం.. 
జిల్లాలో నరసన్నపేట ప్రభుత్వ ఉన్నత పాఠశాల ప్రాంగణంలో జిల్లా జట్లకు పది రోజులు పాటు రెసిడెన్షియల్ శిక్షణా శిబిరాలు అందించి, రాష్ట్ర పోటీల్లో రాణించేలా ఉన్నతంగా తీర్చిదిద్దినట్లు సాఫ్ట్‌ బాల్ అసోసియేషన్ ఆంధ్రప్రదేశ్ రాష్ట్ర కన్వీనర్, జిల్లా కార్యనిర్వహక కార్యదర్శి మొజ్జాడ వెంకటరమణ వెల్లడి చేశారు. జిల్లాలో సాఫ్ట్ బాల్ క్రీడాకారులు సాధించిన పురోగతి ప్రగతి, ఫలితాలను ఆయన వివరించారు. రాష్ట్ర పోటీల్లో జిల్లా జట్లు సమిష్టిగా రాణించి జయకేతనం ఎగురవేయాలని వక్తలు ఆకాంక్షించారు. అంతకుముందు జిల్లా బాలబాలికలు జట్లు, కొచ్ మేనేజర్లకు కలిపి 40 మందికి రూ. 15వేలకు పైగా విలువ చేసే క్రీడా దుస్తులను, మరో 20వేలు వరకు రానుపోను ఖర్చుల కోసం ఎస్ఎస్ఆర్ ట్రస్ట్ తరుపున సూర శ్రీనివాసరావు సమకూర్చారు. ఈ కార్యక్రమంలో సాఫ్ట్ బాల్ అసోసియేషన్ జిల్లా ఉపాధ్యక్షులు మెట్ట తిరుపతిరావు, అన్నెపు రాజగోపాల్, డాక్టర్ పాతిన రమేష్ బాబు, వెంకటరమణ, కోచ్ లు గౌరీ, శివ సీనియర్ క్రీడాకారులు క్రీడాకారుల తల్లిదండ్రులు తదితరులు పాల్గొన్నారు.