రాజకీయ ఫ్లెక్సీలు, విగ్రహాలు, శిలాఫలకాలకు ముసుగులు..
- ఎన్నికల నియమావళి అమలుపై డిప్యూటీ ఎంపీడీవో ఆదేశాలు.
నరసన్నపేట స్థానిక సంస్థల ఎన్నికల నోటిఫికేషన్ విడుదలైన నేపథ్యంలో ఎన్నికల నియమావళిని పక్కాగా అమలు చేయాలని నరసన్నపేట డిప్యూటీ ఎంపీడీవో పిల్లా జగన్మోహనరావు ఆదేశాలు జారీ చేశారు. మండలంలోని అన్ని ప్రభుత్వ కార్యాలయాలు, ప్రభుత్వ స్థలాలు, బహిరంగ ప్రదేశాల్లో ఉన్న రాజకీయ ఫ్లెక్సీలను తొలగించాలని సూచించారు. అలాగే రాజకీయ నాయకుల విగ్రహాలకు ముసుగులు వేయడంతో పాటు, రాజకీయ ప్రచారానికి సంబంధించిన శిలాఫలకాలను కప్పివేయాలని ఆదేశించారు.ఈ మేరకు గ్రామ సచివాలయాల కార్యదర్శులు, సంబంధిత ఉద్యోగులు ఎన్నికల నియమావళి అమలులో నిర్లక్ష్యం వహించకుండా తగిన చర్యలు చేపట్టాలని స్పష్టం చేశారు. ఎన్నికల ప్రవర్తనా నియమావళి ఎక్కడా ఉల్లంఘనకు గురికాకుండా నిరంతరం పర్యవేక్షించాలని సూచించారు.ప్రశాంతమైన వాతావరణంలో ఎన్నికలు నిర్వహించేందుకు అధికారులు, సిబ్బంది సమన్వయంతో పనిచేయాలని, ఎన్నికల నియమావళి అమలుకు రాజకీయ పార్టీలు, ప్రజలు సహకరించాలని డిప్యూటీ ఎంపీడీవో కోరారు.నరసన్నపేట మండలంలోని అన్ని గ్రామాలతో పాటు నరసన్నపేట పట్టణంలోనూ ఎన్నికల ప్రక్రియ ముగిసే వరకు ఈ ఆదేశాలు అమలులో ఉంటాయని ఆయన పేర్కొన్నారు.
