రాజకీయ పార్టీల సహకారంతోనే ప్రశాంతంగా ఎన్నికల నిర్వహణ.

జిల్లా కలెక్టర్ స్వప్నిల్ దినకర్ పుండ్కర్

శ్రీకాకుళం, జిల్లాలో జరగనున్న మున్సిపల్, పరిషత్, పంచాయతీ ఎన్నికలను అత్యంత పారదర్శకంగా, శాంతియుతంగా నిర్వహించేందుకు అన్ని రాజకీయ పార్టీలు పూర్తి స్థాయిలో సహకరించాలని జిల్లా కలెక్టర్ స్వప్నిల్ దినకర్ పుండ్కర్ పిలుపునిచ్చారు. ఎన్నికల నోటిఫికేషన్లు వెలువడిన నేపథ్యంలో, కలెక్టరేట్లోని సమావేశ మందిరంలో శనివారం గుర్తింపు పొందిన రాజకీయ పార్టీల ప్రతినిధులతో "ఎన్నికల ప్రవర్తన నియమావళి, ఎన్నికల ప్రక్రియ" పై ప్రత్యేక అవగాహన సమావేశం నిర్వహించారు. ఈ సందర్భంగా కలెక్టర్ మాట్లాడుతూ, జిల్లావ్యాప్తంగా ఎన్నికల ప్రవర్తన నియమావళి తక్షణమే అమల్లోకి వచ్చిందని స్పష్టం చేశారు. అభ్యర్థులు సభలు, ర్యాలీల నిర్వహణకు ముందస్తు అనుమతులు తప్పనిసరిగా తీసుకోవాలని, ప్రభుత్వ ఆస్తులపై రాతలు, ఫ్లెక్సీల ఏర్పాటు నిషిద్ధమని సూచించారు. ఓటర్లను ప్రలోభాలకు గురిచేసేలా నగదు, మద్యం పంపిణీ చేస్తే కఠిన చర్యలు ఉంటాయని హెచ్చరించారు.పట్టణ స్థానిక సంస్థలు, జడ్పిటిసి, ఎంపీటీసీ, గ్రామ పంచాయతీల ఎన్నికలకు సంబంధించి రాష్ట్ర ఎన్నికల సంఘం వేర్వేరు తేదీలను నిర్దేశించిందని కలెక్టర్ తెలిపారు. మున్సిపల్ ఎన్నికల ప్రక్రియలో భాగంగా అక్టోబర్ 21న నామినేషన్ల ఉపసంహరణ, 28న పోలింగ్, 30న ఓట్ల లెక్కింపు చేపడతామన్నారు. పరిషత్ ఎన్నికల నోటిఫికేషన్ అక్టోబర్ 19న వెలువడుతుందని, అక్టోబర్ 27న నామినేషన్ల ఉపసంహరణ, నవంబర్ 3న పోలింగ్, 5న ఓట్ల లెక్కింపు ఉంటాయని వివరించారు. ఎన్నికల కోడ్ అమలును నిరంతరం పర్యవేక్షించేందుకు జిల్లా వ్యాప్తంగా ఫ్లయింగ్ స్క్వాడ్స్, స్టాటిక్ సర్వైలెన్స్ బృందాలను రంగంలోకి దించినట్లు కలెక్టర్ వెల్లడించారు.పోటీ చేసే అభ్యర్థులు తమ నామినేషన్ పత్రాల్లో అన్ని వివరాలను సరిగ్గా పూరించాలని కలెక్టర్ సూచించారు.నామినేషన్ల చివరి రోజు మినహా మధ్యాహ్నం 3 గంటల తర్వాత నామినేషన్లు స్వీకరించబోమని స్పష్టం చేస్తూ, తిరస్కరణకు గురికాకుండా ఉండేందుకు ఒకరోజు ముందే హెల్ప్ డెస్క్‌ను సంప్రదించి పరిశీలించుకోవాలని చెప్పారు. నామినేషన్ దాఖలు చేసేటప్పుడు ఆర్వో కార్యాలయానికి 100 మీటర్ల వెలుపలే వాహనాలను నిలిపివేయాలని, అభ్యర్థితో పాటు మరో ఇద్దరికి మాత్రమే లోపలికి అనుమతి ఉంటుందని అన్నారు. అభ్యర్థులందరూ ఎన్నికల సంఘం నిర్దేశించిన పరిమితికి లోబడే ఖర్చు చేయాలని, వ్యయ నిబంధనలు మించకూడదని ఆదేశించారు.జిల్లా ఎస్పీ కేవీ మహేశ్వర్ రెడ్డి మాట్లాడుతూ.. ఒకే ప్రాంతంలో రెండు వేర్వేరు పార్టీలు ప్రచారం చేయకుండా పోలీసు ముందస్తు అనుమతితో వేర్వేరు ప్రాంతాలలో నిర్వహించుకోవాలని సూచించారు. సమావేశంలో జాయింట్ కలెక్టర్ ఫర్మాన్ అహ్మద్ ఖాన్, అసిస్టెంట్ కలెక్టర్ హరి ఓం పాండియా, జడ్పీ సీఈవో వెంకటరామన్, జిల్లా పంచాయతీ అధికారి స్వరూప రాణిలతో పాటు వివిధ గుర్తింపు పొందిన రాజకీయ పార్టీల ప్రతినిధులు పీఎంజే బాబు (టీడీపీ), రౌతు శంకరరావు, ఐటీ కుమార్ (వైసీపీ), అర్జున్ కుమార్ (జనసేన), సురేష్ సింగ్ (బీజేపీ), కే.ఎల్.ఎస్. ఈశ్వరి (కాంగ్రెస్), లాసా సోమేశ్వరరావు (బీఎస్పీ), గోవర్ధనరావు (సీపీఎం),  ఎన్నికల విభాగ అధికారులు పాల్గొన్నారు.