పుట్టగుంట ‘బుడమేరు’ వంతెనకు రూ. 100 కోట్లు మంజూరు: దశాబ్ద కాలపు కష్టాలకు మోక్షం!

పుట్టగుంట ‘బుడమేరు’ వంతెనకు రూ. 100 కోట్లు మంజూరు: దశాబ్ద కాలపు కష్టాలకు మోక్షం!

నందివాడ- సూర్య ప్రతినిధి :
కృష్ణా - ఏలూరు జిల్లాల ప్రజల దశాబ్దాల నాటి చిరకాల కల ఎట్టకేలకు ఫలించింది. నందివాడ మండలం పుట్టగుంట వద్ద బుడమేరు ఏటిపై హైలెవెల్ వంతెన నిర్మాణానికి ప్రభుత్వం రూ. 100 కోట్ల నిధులను మంజూరు చేసిందని ఎన్హెచ్ ఆర్అండ్బీ ఏఈ శరత్ చంద్ర తెలిపారు. నిధులు విడుదల కావడంతో ఇంజనీరింగ్ అధికారులు క్షేత్రస్థాయిలో సర్వే పనులను యుద్ధప్రాతిపదికన ప్రారంభించారు.
నిజానికి పదేళ్ల క్రితమే మచిలీపట్నం - నూజివీడు - కల్లూరు(ఎమ్ఎన్కే) రహదారి అభివృద్ధిలో భాగంగా ప్రపంచ బ్యాంకు మంజూరు చేసిన రూ. 300 కోట్ల నిధుల్లోనే వంతెన కట్టాల్సి ఉన్నా.. నాటి పాలకుల నిర్లక్ష్యంతో పనులు చేయక వెనక్కి వెళ్లిపోయాయి. దీంతో ఏటా వర్షాకాలంలో బుడమేరు పొంగిపొర్లి రోజుల తరబడి ఏపీ - తెలంగాణ మధ్య, కృష్ణా - ఏలూరు జిల్లాల మధ్య రాకపోకలు పూర్తిగా స్తంభించిపోయేవి. అంతేకాక వెనకకు తన్నే వరద నీటితో ఏటి పరివాహక గ్రామాల్లోని వేలాది ఎకరాల వరి పంటలు నీట మునిగి రైతులు కోట్లాది రూపాయలు నష్టపోయేవారు. ప్రస్తుతం రూ. 100 కోట్లతో ఆధునిక వంతెన పనులు పట్టాలెక్కడం, అధికారులు భూసార పరీక్షలు, పిల్లర్ల మార్కింగ్ పనులను పర్యవేక్షిస్తుండటంతో ప్రయాణికులు, రైతాంగం హర్షం వ్యక్తం చేస్తున్నారు.