ప్రజా ప్రయోజనాల విషయంలో రాజీ పడబోం అభివృద్ధి, సంక్షేమానికి సమాన ప్రాధాన్యం: ఎమ్మెల్యే సోమిరెడ్డి

ప్రజా ప్రయోజనాల విషయంలో రాజీ పడబోం

అభివృద్ధి, సంక్షేమానికి సమాన ప్రాధాన్యం: ఎమ్మెల్యే సోమిరెడ్డి

వెంకటాచలం మేజర్ న్యూస్ :    ప్రజా ప్రయోజనాల విషయంలో రాజీ పడకుండా ముందుకు సాగుతున్నామని సర్వేపల్లి ఎమ్మెల్యే సోమిరెడ్డి చంద్రమోహన్‌రెడ్డి అన్నారు. వెంకటాచలం మండలం రామదాసుకండ్రిగ పంచాయతీలో శుక్రవారం పలు అభివృద్ధి పనులను ప్రారంభించి, మరికొన్ని పనులకు శంకుస్థాపన చేశారు.ఈ సందర్భంగా డాక్టర్ బీఆర్ అంబేద్కర్ విగ్రహాన్ని ఆవిష్కరించారు. పోర్టు రోడ్డు నుంచి రామదాసుకండ్రిగ, ఇడిమేపల్లి, ఈదగాలి మీదుగా పూడిపర్తి వరకు రూ.4 కోట్లతో నిర్మించనున్న రహదారికి శంకుస్థాపన చేశారు. రూ.11.15 లక్షలతో నిర్మించిన శ్మశానవాటిక ప్రహరీని ప్రారంభించారు. గూడూరు నుంచి రామదాసుకండ్రిగ మీదుగా నెల్లూరుకు పునరుద్ధరించిన బస్సు సర్వీసును ప్రారంభించారు. స్త్రీనిధి ద్వారా రెండు గ్రూపులకు రూ.13 లక్షలు, బ్యాంకు లింకేజీ ద్వారా మరో గ్రూపునకు రూ.20 లక్షల చెక్కులను పంపిణీ చేశారు.కూటమి ప్రభుత్వం రెండేళ్ల పాలనలో రామదాసుకండ్రిగలో రూ.4.90 కోట్లతో అభివృద్ధి పనులు చేపట్టామని సోమిరెడ్డి తెలిపారు. సంక్షేమంతో పాటు అభివృద్ధికి సమాన ప్రాధాన్యం ఇస్తున్నామని చెప్పారు. పంచాయతీరాజ్‌ నిధులను గ్రామాల అభివృద్ధికే ఖర్చు చేస్తున్నామన్నారు. వ్యవసాయం, ఇరిగేషన్‌, ఆర్‌అండ్‌బీ శాఖలను గాడిలో పెట్టి అభివృద్ధి పనులను వేగవంతం చేస్తున్నామని పేర్కొన్నారు.సర్వేపల్లి నియోజకవర్గంలో పరిశ్రమల ఏర్పాటుకు చర్యలు తీసుకుంటున్నామని తెలిపారు. గోకుల్‌ కంపెనీకి 11.70 ఎకరాలు కేటాయించామని, సంతోషిమాత కంపెనీకి 22 ఎకరాలు కేటాయించనున్నట్లు చెప్పారు. రైతులకు గతంలో ఎకరాకు రూ.19 లక్షలు మాత్రమే అందేవని, ప్రస్తుతం రూ.35 లక్షలు ఇప్పించామని, అదనంగా మరో రూ.2 లక్షలు కూడా ఇప్పించనున్నట్లు తెలిపారు.ఇరిగేషన్‌ పనుల్లో పారదర్శకతకు ప్రాధాన్యం ఇస్తున్నామని, పని చేయకుండా బిల్లులు చేస్తే కఠిన చర్యలు తప్పవని అధికారులను, నీటి సంఘాల ప్రతినిధులను హెచ్చరించినట్లు చెప్పారు. ప్రతి కాలువ పనికి ముందు, తర్వాత జీపీఎస్‌ ఆధారిత ఫొటోలు తీస్తున్నామని ఎమ్మెల్యే సోమిరెడ్డి తెలిపారు.