పత్రికా ప్రకటన అనుమతులు లేని సైనిక్‌, నవోదయ కోచింగ్‌ సెంటర్లపై చర్యలు తీసుకోవాలి జీవో ఎంఎస్‌ నంబర్‌ 9ను అమలు చేయాలి – విద్యార్థి సంఘాల డిమాండ్‌ అన్నమయ్య జిల్లా – మదనపల్లె: అన్నమయ్య జిల్లా వ్యాప్తంగా ప్రభుత్వ అనుమతులు లేకుండా నిర్వహిస్తున్న సైనిక్‌, నవోదయ తదితర కోచింగ్‌ సెంటర్లపై తక్షణమే చర్యలు త
అనుమతులు లేని సైనిక్‌, నవోదయ కోచింగ్‌ సెంటర్లపై చర్యలు తీసుకోవాలి
జీవో ఎంఎస్‌ నంబర్‌ 9ను అమలు చేయాలి – విద్యార్థి సంఘాల డిమాండ్‌
అన్నమయ్య జిల్లా – మదనపల్లె:
అన్నమయ్య జిల్లా వ్యాప్తంగా ప్రభుత్వ అనుమతులు లేకుండా నిర్వహిస్తున్న సైనిక్‌, నవోదయ తదితర కోచింగ్‌ సెంటర్లపై తక్షణమే చర్యలు తీసుకోవాలని యూఎస్‌ఎఫ్‌ఐ, ఏపీఎస్‌ జేఏసీ విద్యార్థి సంఘాల నాయకులు డిమాండ్‌ చేశారు. ఈ మేరకు మదనపల్లెలో నిర్వహించిన ప్రజా సమస్యల పరిష్కార వేదిక (పీజీఆర్ఎస్‌)లో సబ్‌ కలెక్టర్‌ చల్లా కళ్యాణికి వినతిపత్రం అందజేశారు.
ఈ సందర్భంగా యూఎస్‌ఎఫ్‌ఐ రాష్ట్ర ఉపాధ్యక్షుడు నరసింహ సర్వేపల్లి, ఏపీఎస్‌ జేఏసీ రాష్ట్ర అధ్యక్షుడు ఉత్తన్న మాట్లాడుతూ.. రాష్ట్ర ప్రభుత్వం 09-03-2026న విడుదల చేసిన జీవో ఎంఎస్‌ నంబర్‌ 9ను పకడ్బందీగా అమలు చేయాలని కోరారు. ఈ జీవో ప్రకారం కోచింగ్‌ సెంటర్ల నిర్వహణకు అవసరమైన అనుమతులు, నిబంధనలను తప్పనిసరిగా అమలు చేయాల్సి ఉన్నప్పటికీ, జిల్లాలో పలు కేంద్రాలు నిబంధనలకు విరుద్ధంగా కొనసాగుతున్నాయని ఆరోపించారు.
సైనిక్‌, నవోదయ, ఐఐటీ, ట్రిపుల్‌ ఐటీ, నీట్‌, జేఈఈ మెయిన్స్‌, బ్యాంకింగ్‌, యూపీఎస్సీ తదితర కోచింగ్‌ సెంటర్ల నిర్వహణపై అధికారులు ప్రత్యేక దృష్టి సారించాలని కోరారు. దసరా సెలవుల్లోనూ విద్యార్థులను ఉదయం నుంచి సాయంత్రం వరకు కోచింగ్‌ పేరుతో తరగతులకు హాజరుకావాలని ఒత్తిడి చేయడం వల్ల వారు మానసిక ఒత్తిడికి గురవుతున్నారని ఆవేదన వ్యక్తం చేశారు.
కలికిరిలోని శాంతినికేతన్‌, రాయచోటిలోని నందిని, విజేత, మురళి విజ్ఞానం, మదనపల్లెలోని మల్లికార్జున, రిత్విక్‌, బాసర, వాణిశ్రీ, పీలేరులోని అక్షర తదితర కోచింగ్‌ సెంటర్లతో పాటు పుంగనూరు నియోజకవర్గ కేంద్రంలోని కోచింగ్‌ సంస్థల నిర్వహణపై సంబంధిత అధికారులు విచారణ జరిపి, నిబంధనల ప్రకారం చర్యలు తీసుకోవాలని డిమాండ్‌ చేశారు.
విద్యాశాఖ అధికారులు, కోచింగ్‌ సెంటర్ల పర్యవేక్షణ బాధ్యతలు నిర్వహించే అధికారులు నిర్లక్ష్యాన్ని వీడి, విద్యార్థుల హక్కులు, సంక్షేమాన్ని కాపాడాలని విజ్ఞప్తి చేశారు. అనుమతులు లేని కోచింగ్‌ సెంటర్లను గుర్తించి, నిబంధనల ప్రకారం వాటిపై చర్యలు తీసుకోవాలని కోరారు.
ఈ కార్యక్రమంలో ఏపీఎస్‌ జేఏసీ జిల్లా అధ్యక్షుడు గంగరాజు, యూఎస్‌ఎఫ్‌ఐ జిల్లా నాయకుడు గణేష్‌ రాయల్‌ తదితరులు పాల్గొన్నారు.
సి శ్రీనివాసులు సూర్య స్టాఫ్ రిపోర్టర్ మదనపల్లి
