నూజివీడు లో నామినేషన్ల సందడే... సందడి...- 110 నామినేషన్ల దాఖలు - భారీ స్థాయిలో ఊరేగింపుగా వచ్చిన అభ్యర్థులు!

నూజివీడు, మేజర్ న్యూస్ : స్థానిక సంస్థల ఎన్నికలలో భాగంగా నూజివీడు పురపాలక సంఘం పరిధిలో జరుగుతున్న వార్డు కౌన్సిలర్లు, చైర్మన్ పదవులకు ఆదివారం నాడు ఎంతో సందడి సందడిగా అభ్యర్థులు నామినేషన్లు దాఖలు చేశారు. భారీ స్థాయిలో ఊరేగింపుతో  వచ్చిన కూటమి అభ్యర్థులు, వైయస్సార్ కాంగ్రెస్ పార్టీ అభ్యర్థులు ఎన్నికల అధికారులకు నామినేషన్ పత్రాలు అందజేశారు. కూటమి చైర్మన్ అభ్యర్థిగా బర్రె ఇళయరాజా మంత్రి పార్థసారథి సమక్షంలో అధికారులకు నామినేషన్ పత్రాలు అందజేశారు. ఈ సందర్భంగా మంత్రి పార్థసారధి మాట్లాడుతూ గతంలో ఎన్నడూ లేనివిధంగా నూజివీడు పట్టణాన్ని గడచిన కాలంలో అభివృద్ధి చేశానని, జరిగిన అభివృద్ధి అభ్యర్థుల విజయానికి సోపానమని అన్నారు. అభివృద్ధి కాంక్షించే ప్రతి ఒక్కరూ కూటమి అభ్యర్థుల విజయానికి కృషి చేయాలని కోరారు. ఈ కార్యక్రమంలో పలువురు కౌన్సిలర్ అభ్యర్థులు,  పార్టీ నాయకులు పాల్గొన్నారు.

లవ కుమార్ నామినేషన్ దాఖలు 

నూజివీడు పురపాలక సంఘం ఎన్నికలలో చైర్మన్ అభ్యర్థిగా వైఎస్ఆర్ కాంగ్రెస్ పార్టీ తరపున పోటీ చేస్తున్న  కంచర్ల లవ కుమార్ ఆదివారం ఉదయం నామినేషన్ దాఖలు చేశారు. ముందు స్థానిక ద్వారకా ఎస్టేట్ నుంచి భారీ స్థాయిలో ఊరేగింపుగా పురపాలక సంఘం కార్యాలయానికి తరలి వెళ్లారు. నూజివీడు మాజీ శాసనసభ్యులు మేక వెంకట ప్రతాప్ అప్పారావు ఆశీస్సులతో చైర్మన్ అభ్యర్థిగా బరిలో దిగుతున్నానని, నూజివీడు పురపాలక సంఘంలో మార్పు కోసం ప్రతి ఒక్కరూ తనను బలపరచాలని కంచర్ల లవ కుమార్ కోరారు. నామినేషన్ పత్రాలు ఎన్నికల అధికారి, పురపాలక సంఘం కమిషనర్ పిరయ్యకు అందజేశారు.

 ఇండియా కూటమి బలపరిచిన చైర్మన్ అభ్యర్థిగా భత్తుల లక్ష్మీ కోటేశ్వరమ్మ, స్వతంత్ర చైర్మన్ అభ్యర్థిగా మాజీ కౌన్సిలర్ న్యాయవాది ఇందుపల్లి సత్య ప్రకాష్ లు నామినేషన్లు దాఖలు చేసిన వారిలో ఉన్నారు. చైర్మన్ వార్డ్ కౌన్సిల పదవులకు వివిధ రాజకీయ పార్టీల నాయకులు స్వతంత్రులు కలిపి 110 నామినేషన్లో దాఖలు అయినట్లు అధికారులు తెలిపారు.

 రిపోర్టర్ తాత ప్రసాద్ నూజివీడు ఏలూరు జిల్లా,