నరసన్నపేటలో ఆగని ఆక్రమణలు!

చెరువులు, రోడ్లపై యథేచ్ఛగా ఆక్రమణలు?

నరసన్నపేట సెప్టెంబర్ 29 మేజర్ న్యూస్ : నరసన్నపేట మేజర్‌ పంచాయతీ పరిధిలో ఆక్రమణల పరంపర కొనసాగుతోందని స్థానికులు ఆరోపిస్తున్నారు. ముఖ్యంగా ప్రభుత్వ భూములు, చెరువులు, రహదారులపై ఆక్రమణలు జరుగుతున్నా సంబంధిత అధికారులు పట్టించుకోవడం లేదని పట్టణ ప్రజలు ఆవేదన వ్యక్తం చేస్తున్నారు. టీవీఆర్‌ షాపింగ్‌ మాల్‌ ఎదురుగా నడిరోడ్డుపై దుకాణాలు ఏర్పాటు చేసి రహదారి స్థలాన్ని ఆక్రమించినట్లు స్థానికులు చెబుతున్నారు. ఈ విషయంపై రెవెన్యూ, గ్రామపంచాయతీ అధికారులు దృష్టి సారించకపోవడంపై విమర్శలు వ్యక్తమవుతున్నాయి. తాజాగా మంగళవారం సూర్యనారాయణ స్వామి ఆలయం సమీపంలోని బసవన్న చెరువులో విలువైన భూమి ఆక్రమణకు గురవుతున్నట్లు స్థానికులు ఆరోపించారు. కోట్ల రూపాయల విలువైన చెరువు భూముల పరిరక్షణలో అధికారులు నిర్లక్ష్యంగా వ్యవహరిస్తున్నారని వారు పేర్కొన్నారు. చెరువుల ఆక్రమణలు కొంతకాలంగా కొనసాగుతున్నప్పటికీ సంబంధిత అధికారులు స్పందించకపోవడంపై పట్టణ ప్రజలు ప్రశ్నిస్తున్నారు. ప్రభుత్వ ఆస్తులు, చెరువులు, రహదారులు ఆక్రమణలకు గురవుతున్నా అధికారులు మౌనం వహించడంపై అనుమానాలు వ్యక్తం చేస్తున్నారు. ఇప్పటికైనా రెవెన్యూ, గ్రామపంచాయతీ అధికారులు సమగ్రంగా పరిశీలించి, ప్రభుత్వ భూములు, చెరువులు, రహదారులపై జరిగిన ఆక్రమణలను గుర్తించి నిబంధనల ప్రకారం చర్యలు తీసుకోవాలని పట్టణ ప్రజలు కోరుతున్నారు.