నారాయణ మెడికల్ కాలేజీలో ఘనంగా 57వ ఎన్ఎస్ఎస్ ఫౌండేషన్ డే
నారాయణ మెడికల్ కాలేజీలో ఘనంగా 57వ ఎన్ఎస్ఎస్ ఫౌండేషన్ డే
నెల్లూరు కల్చరల్ మేజర్ న్యూస్
నెల్లూరు నారాయణ మెడికల్ కాలేజీలో 57వ ఎన్ఎస్ఎస్ ఫౌండేషన్ డే వేడుకలు అత్యంత ఘనంగా జరిగాయి. ఇదే వేదికపై విద్యార్థుల్లోని ప్రతిభ, నాయకత్వ లక్షణాలు, సృజనాత్మకతను వెలికితీసేందుకు ఉద్దేశించిన ‘వివిధ - స్టూడెంట్ క్లబ్స్’ను కూడా అధికారికంగా ప్రారంభించారు. కళాశాల డీన్, ఎన్ఎస్ఎస్ చైర్మన్ డాక్టర్ పి. శ్రీనివాసులు రెడ్డి మార్గదర్శకత్వంలో, నోడల్ ఆఫీసర్ డాక్టర్ డి.ఎం. కార్తిక్ సమన్వయంతో ఈ కార్యక్రమం ఉత్సాహభరితంగా సాగింది.
జ్యోతి ప్రజ్వలనతో ప్రారంభమైన ఈ కార్యక్రమంలో ముందుగా డీన్ డాక్టర్ పి. శ్రీనివాసులు రెడ్డి ఎన్ఎస్ఎస్ వార్షిక నివేదికను సమర్పించారు. విద్యార్థులు చేపట్టిన వివిధ సేవా, సామాజిక అవగాహన కార్యక్రమాలను ఆయన కొనియాడారు. విశిష్ట సేవలు అందించిన వాలంటీర్లకు బ్యాడ్జీలు ప్రదానం చేసి, వారితో ఎన్ఎస్ఎస్ ప్రతిజ్ఞ చేయించారు. ఎన్ఎస్ఎస్కు విశేష సహకారం అందిస్తున్న డీన్ను ఈ సందర్భంగా యూనిట్ సభ్యులు ఘనంగా సత్కరించారు.
అనంతరం విద్యార్థుల సర్వతోముఖాభివృద్ధి కోసం ఏర్పాటు చేసిన ‘వివిధ’ స్టూడెంట్ క్లబ్స్ లోగోను, మ్యాగజైన్ను డీన్ ఆవిష్కరించారు. స్టూడెంట్ కౌన్సిల్ నియామక ఉత్తర్వులపై సంతకం చేసి నోడల్ ఆఫీసర్ కు అందజేశారు.
ఈ కార్యక్రమంలో పలువురు విభాగాధిపతులు (హెచ్ఓడీలు), అధ్యాపకులు, విద్యార్థులు పెద్ద సంఖ్యలో పాల్గొన్నారు. చివరగా విద్యార్థులు ప్రదర్శించిన సాంస్కృతిక కార్యక్రమాలు ఎంతగానో ఆకట్టుకున్నాయి.
