మునిసిపల్ ఎన్నికల పరిశీలకులు నియామకం

నేటి దినపత్రిక సూర్య బ్యూరో రాజమహేంద్రవరం

తూర్పు గోదావరి జిల్లాలో మున్సిపల్ సంస్థలకు నిర్వహించనున్న స్థానిక సంస్థల సాధారణ ఎన్నికలు పారదర్శకంగా, నిష్పాక్షికంగా నిర్వహించేందుకు రాష్ట్ర ఎన్నికల సంఘం జనరల్, వ్యయ పరిశీలకులను నియమించింది. ఈ మేరకు జిల్లా కలెక్టర్, జిల్లా ఎన్నికల అధికారి కీర్తి చేకూరి శనివారం పరిశీలకుల వివరాలను వెల్లడించారు.

జనరల్ పరిశీలకురాలిగా ఎం. గౌతమి, ఐఏఎస్‌ (కార్యదర్శి, ఏపీ గిరిజన సంక్షేమ గురుకుల విద్యాలయాల సంస్థ) నియమితులయ్యారు. ఆమెను 8977935065 నంబరులో సంప్రదించవచ్చు.

వ్యయ పరిశీలకుడిగా నరేంథిరన్ జి.జి., ఐఎఫ్‌ఎస్‌ (డిప్యూటీ కన్జర్వేటర్ ఆఫ్ ఫారెస్ట్స్, ప్రిన్సిపల్ చీఫ్ కన్జర్వేటర్ ఆఫ్ ఫారెస్ట్స్ కార్యాలయం, మంగళగిరి) నియమితులయ్యారు. ఆయనను 8977935071 నంబరులో సంప్రదించవచ్చు.

జనరల్ పరిశీలకురాలు ఎన్నికల నిర్వహణ, ఎన్నికల ప్రవర్తనా నియమావళి అమలు, పోలింగ్ ఏర్పాట్లు, సిబ్బంది శిక్షణ, భద్రతా చర్యలను పర్యవేక్షిస్తారు. అభ్యర్థులు, రాజకీయ పార్టీలు, ఓటర్ల నుంచి వచ్చే ఎన్నికల సంబంధిత ఫిర్యాదులను పరిశీలించి, నిబంధనల ప్రకారం పరిష్కారానికి చర్యలు తీసుకుంటారు.

ఎన్నికల ఖర్చులపై నిఘా**

వ్యయ పరిశీలకుడు అభ్యర్థులు ఎన్నికల ప్రచారానికి చేసే ఖర్చులు నిర్ణీత పరిమితులకు లోబడి ఉన్నాయో లేదో పరిశీలిస్తారు. వ్యయ రిజిస్టర్ల తనిఖీ, ప్రచార ఖర్చుల లెక్కల ధ్రువీకరణతోపాటు నగదు, మద్యం, ఇతర ప్రలోభాల పంపిణీని అరికట్టేందుకు ఏర్పాటు చేసిన ఫ్లయింగ్ స్క్వాడ్లు, స్టాటిక్ సర్వైలెన్స్ బృందాల పనితీరును పర్యవేక్షిస్తారు.

ఎన్నికల ప్రక్రియలో పారదర్శకతను కాపాడేందుకు, ఎన్నికల నిబంధనల ఉల్లంఘనలను అరికట్టేందుకు పరిశీలకులు తమ విధులను నిర్వహిస్తారని కలెక్టర్ తెలిపారు.