మూడు గంటల్లోనే ఐదేళ్ల చిన్నారి ఆచూకీ హిందూపురం ఆసుపత్రి నుంచి అదృశ్యం.. గౌని మేకలపల్లిలో సురక్షితంగా గుర్తింపు ఎస్పీ ఆదేశాలతో అప్రమత్తమైన పోలీసులు.. తల్లిదండ్రులకు అప్పగింత

అనంతపురం బ్యూరో : హిందూపురం పట్టణంలో కనిపించకుండా పోయిన ఐదేళ్ల చిన్నారిని పోలీసులు కేవలం మూడు గంటల్లోనే సురక్షితంగా గుర్తించి తల్లిదండ్రులకు అప్పగించారు. జిల్లా ఎస్పీ శ్రీ ఎస్. సతీష్ కుమార్ ఐపీఎస్ ఆదేశాలతో పోలీసులు తక్షణమే స్పందించి ముమ్మరంగా గాలింపు చేపట్టడంతో చిన్నారి ఆచూకీ లభించింది.

హిందూపురం ఆసుపత్రిలో బుధవారం ఉదయం సుమారు 8.30 గంటల సమయంలో చిన్నారి కనిపించకుండా పోయినట్లు తల్లిదండ్రులు పోలీసులకు ఫిర్యాదు చేశారు. విషయం ఎస్పీ దృష్టికి వెళ్లడంతో జిల్లాలోని పోలీసు అధికారులను అప్రమత్తం చేశారు. అదనపు ఎస్పీ కె.వి. మహేష్ పర్యవేక్షణలో సీఐలు ఆంజనేయులు, జనార్ధన్, జయప్రసాద్, ఎస్‌ఐ నరేంద్రతో పాటు క్రైమ్ పార్టీ, ఇతర సిబ్బందితో ప్రత్యేక బృందాలను ఏర్పాటు చేసి గాలింపు చర్యలు చేపట్టారు.

చిన్నారికి సంబంధించిన వివరాలు, అందుబాటులో ఉన్న ఆధారాలు, పరిసర ప్రాంతాలను పరిశీలిస్తూ పోలీసులు విస్తృతంగా గాలింపు చేపట్టారు. ఈ క్రమంలో రొద్దం మండలం గౌని మేకలపల్లి గ్రామంలో చిన్నారి ఉన్నట్లు గుర్తించారు. వెంటనే అక్కడికి చేరుకున్న పోలీసులు చిన్నారిని సురక్షితంగా రక్షించి తల్లిదండ్రులకు అప్పగించారు.

తల్లిదండ్రుల కృతజ్ఞతలు

తమ కుమార్తెను తక్కువ సమయంలోనే సురక్షితంగా గుర్తించి అప్పగించిన జిల్లా ఎస్పీ, హిందూపురం పోలీసులకు చిన్నారి తల్లిదండ్రులు కృతజ్ఞతలు తెలిపారు. పోలీసులు వేగంగా స్పందించి చేపట్టిన గాలింపు చర్యలపై స్థానికులు హర్షం వ్యక్తం చేశారు.

చిన్నారుల భద్రతకు ప్రాధాన్యత

అదనపు ఎస్పీ కె.వి. మహేష్ మాట్లాడుతూ చిన్నారుల భద్రతకు పోలీసులు అత్యంత ప్రాధాన్యత ఇస్తున్నారని తెలిపారు. పిల్లలు కనిపించకుండా పోయిన సందర్భాల్లో తల్లిదండ్రులు ఎలాంటి ఆలస్యం చేయకుండా వెంటనే పోలీసులకు సమాచారం అందించాలని సూచించారు. సమాచారం అందిన వెంటనే అన్ని కోణాల్లో దర్యాప్తు చేపట్టి చిన్నారుల ఆచూకీ కోసం ప్రత్యేక చర్యలు తీసుకుంటామని పేర్కొన్నారు.

చిన్నారిని సురక్షితంగా గుర్తించి తల్లిదండ్రులకు అప్పగించడంలో చురుకుగా పనిచేసిన పోలీసు అధికారులను, సిబ్బందిని ఎస్పీ ఎస్. సతీష్ కుమార్ అభినందించారు.

రిపోర్టర్ : మొయినుద్దీన్, అనంతపురం బ్యూరో, అనంతపురం.