మంత్రి గొట్టిపాటి రవికుమార్ చొరవతో దైవాలరావూరు భూములకు విముక్తి.

దశాబ్ద కాలంగా పరిష్కారం కాని సమస్యకు తెర.. నిషేధిత జాబితా నుంచి భూముల తొలగింపు.

సూర్య కొరిసపాడు.

మంత్రి గొట్టిపాటి రవికుమార్ చొరవతో దైవాలరావూరు గ్రామస్తుల దశాబ్ద కాలం నాటి భూముల సమస్యకు పరిష్కారం లభించింది. గ్రామానికి చెందిన గ్రామ కంఠం భూములను దేవాదాయ శాఖ నిషేధిత జాబితా నుంచి తొలగిస్తూ దేవాదాయ శాఖ కమిషనర్ కె. రామచంద్ర మోహన్ ఉత్తర్వులు జారీ చేశారు. గురువారం ఈ ఉత్తర్వులు గ్రామస్తులకు అందడంతో ఎన్నో ఏళ్లుగా ఎదురుచూస్తున్న వారికి ఊరట లభించింది. దైవాలరావూరు గ్రామానికి చెందిన సర్వే నంబర్ 253లోని మొత్తం భూమిని దేవాదాయ శాఖ నిషేధిత జాబితాలో ఉంచింది. అయితే, వాస్తవానికి ఈ సర్వే నంబర్‌లో శ్రీ చెన్నకేశవ స్వామివారికి చెందిన 29 సెంట్ల భూమి మాత్రమే దేవాదాయ శాఖకు సంబంధించినది. మిగిలిన భూములపై రిజిస్ట్రేషన్లు జరగక గ్రామస్తులు సంవత్సరాల తరబడి తీవ్ర ఇబ్బందులు ఎదుర్కొన్నారు. గత వైసీపీ ప్రభుత్వ హయాంలో పలుమార్లు ప్రజాప్రతినిధుల దృష్టికి తీసుకెళ్లినా సమస్య పరిష్కారం కాలేదు. కూటమి ప్రభుత్వం అధికారంలోకి వచ్చిన అనంతరం రెండు నెలల క్రితం దైవాలరావూరు గ్రామస్తులు తమ సమస్యను ఇంధన శాఖ మంత్రి గొట్టిపాటి రవికుమార్ దృష్టికి తీసుకెళ్లారు. గ్రామస్తుల సమస్యను విన్న మంత్రి వెంటనే స్పందించి జిల్లా కలెక్టర్‌ను ఆదేశించారు. భూములకు సంబంధించిన పూర్తి వివరాలు, అవసరమైన పత్రాలను పరిశీలించి, నిషేధిత జాబితా నుంచి అర్హత ఉన్న భూములను తొలగించేందుకు చర్యలు తీసుకోవాలని సూచించారు. మంత్రి ఆదేశాల మేరకు అధికారులు అన్ని పత్రాలను దేవాదాయ శాఖకు సమర్పించారు. పత్రాలను పరిశీలించిన దేవాదాయ శాఖ కమిషనర్ కె. రామచంద్ర మోహన్.. సర్వే నంబర్ 253/1లోని 26.42 సెంట్ల భూమిని నిషేధిత జాబితా నుంచి తొలగిస్తూ ఉత్తర్వులు జారీ చేశారు. దీంతో ఏళ్ల తరబడి తమ సొంత భూములపై హక్కులు ఉన్నప్పటికీ రిజిస్ట్రేషన్లు చేసుకోలేక ఎదురుచూసిన గ్రామస్తుల నిరీక్షణకు తెరపడింది. తమ సమస్యను అర్థం చేసుకుని వెంటనే స్పందించిన మంత్రి గొట్టిపాటి రవికుమార్ చొరవతోనే ఇది సాధ్యమైందని గ్రామస్తులు హర్షం వ్యక్తం చేశారు. దశాబ్ద కాలంగా తమకు తీరని సమస్యగా ఉన్న భూముల వ్యవహారం ఒక్కసారిగా పరిష్కారం కావడంతో గ్రామస్తుల ఆనందానికి అవధులు లేకుండా పోయాయి. “ఎన్నో ఏళ్లుగా అధికారుల చుట్టూ తిరిగినా పరిష్కారం కాలేదు.. మంత్రి రవికుమార్ దృష్టికి తీసుకెళ్లిన కొద్ది కాలంలోనే సమస్య పరిష్కారమైంది” అంటూ గ్రామస్తులు భావోద్వేగంతో పేర్కొన్నారు. తమ భూములకు రిజిస్ట్రేషన్‌కు మార్గం సుగమం చేసిన మంత్రి గొట్టిపాటి రవికుమార్‌కు దైవాలరావూరు గ్రామస్తులు హృదయపూర్వక కృతజ్ఞతలు తెలిపారు.