మహాభారత ప్రవచనకర్త కపిలవాయి అచ్యుత రామారావుకు ఘన సన్మానం ఆధ్యాత్మిక సేవలకు గుర్తింపుగా ఆలయ కమిటీ, భజన బృందం ఆధ్వర్యంలో సత్కారం

టి.నరసాపురం, మేజర్ న్యూస్:గ్రామంలో ఆధ్యాత్మిక వాతావరణాన్ని పెంపొందిస్తూ మహాభారతంలోని ధర్మసూక్ష్మాలను ప్రజలకు వివరిస్తూ ప్రవచనాలు అందించిన ప్రముఖ ప్రవచనకర్త శ్రీ కపిలవాయి అచ్యుత రామారావుకు ఘనంగా సన్మానం నిర్వహించారు.అక్టోబర్ 26వ తేదీ నుంచి నవంబర్ 1వ తేదీ వరకు వారం రోజులపాటు నిర్వహించిన మహాభారత ప్రవచన కార్యక్రమం ఆదివారం ముగిసింది. ఈ సందర్భంగా శ్రీ అన్నపూర్ణ విశాలాక్షి సమేత కాశీ విశ్వేశ్వర స్వామి వారి దేవస్థాన ఆలయ ప్రాంగణంలో ఆలయ కమిటీ, ఉత్సవ కమిటీ సభ్యులు, భజన బృందం ఆధ్వర్యంలో అచ్యుత రామారావును ఘనంగా సత్కరించి, జ్ఞాపికను అందజేశారు.ఈ సందర్భంగా అచ్యుత రామారావు మాట్లాడుతూ.. మహాభారతం కేవలం ఒక ఇతిహాసం మాత్రమే కాదని, మానవ జీవితానికి మార్గదర్శకమైన గొప్ప ధర్మగ్రంథమని అన్నారు. ఇందులోని ప్రతి పాత్ర, ప్రతి సంఘటన మనిషికి ఎన్నో జీవిత పాఠాలను నేర్పుతుందని తెలిపారు. ధర్మం, సత్యం, న్యాయం, కుటుంబ విలువలు, మానవ సంబంధాల ప్రాధాన్యతను మహాభారతం ద్వారా తెలుసుకోవచ్చన్నారు.

తనకు ఈ గ్రామంలో మహాభారత ప్రవచనాలు అందించే అవకాశం కల్పించిన ఆలయ కమిటీ, ఉత్సవ కమిటీ సభ్యులకు, భజన బృందానికి, కార్యక్రమానికి సహకరించిన గ్రామ పెద్దలకు, భక్తులకు ప్రత్యేక కృతజ్ఞతలు తెలిపారు. ఆధ్యాత్మిక కార్యక్రమాలను నిర్వహించడం ద్వారా భావితరాలకు మన సంస్కృతి, సంప్రదాయాలను అందించవచ్చని పేర్కొన్నారు.ఈ కార్యక్రమంలో ఆలయ కమిటీ, ఉత్సవ కమిటీ సభ్యులు, భజన బృందం సభ్యులు, గ్రామ పెద్దలు, భక్తులు పాల్గొన్నారు.

 పసుమర్తి రాము జిల్లా ఇంచార్జ్ ఏలూరు