మధ్యవర్తిత్వంతోనే వివాదాలకు శాశ్వత పరిష్కారం.

• పలాసలో అవగాహన కార్యక్రమం.

పలాస, అక్టోబర్ 1,మేజర్ న్యూస్.

జాతీయ,రాష్ట్ర,జిల్లా న్యాయ సేవాధికార సంస్థల ఆదేశాల మేరకు, మధ్యవర్తిత్వం దేశం కోసం అనే పేరిట, దేశవ్యాప్తంగా 90 రోజుల కార్యక్రమంలో భాగంగా,ఆగస్టు ఒకటి నుంచి డిసెంబర్ 31 వరకు ప్రత్యేక కార్యక్రమాన్ని నిర్వహిస్తున్నారు.ఈ మేరకు మండల న్యాయ సేవా సంఘం అధ్యక్షులు మరియు సివిల్ జడ్జి (జూనియర్ డివిజన్) పలాస వారి సూచనలతో గురువారం అవగాహన కార్యక్రమం నిర్వహించారు.రాజాం కాలనీ (పాయకరాంపురం) గ్రామంలో మధ్యవర్తిత్వం (మీడియేషన్) పై అవగాహన కల్పించి, స్థానికులకు కరపత్రాలు పంపిణీ చేశారు.ఈ కార్యక్రమాన్ని ట్రైనింగ్ పొందిన న్యాయవాద మీడియేటర్ జి.ఎం.ఎస్. అనిల్ రాజు నిర్వహించారు. కోర్టులో కేసులు వేసి సంవత్సరాల తరబడి తిరగడం కంటే, మధ్యవర్తిత్వం ద్వారా తక్కువ ఖర్చుతో, త్వరగా, సామరస్యంగా వివాదాలను పరిష్కరించుకోవచ్చని ఆయన వివరించారు. ప్రజలందరూ ఈ అవకాశాన్ని సద్వినియోగం చేసుకోవాలని కోరారు.