మాజీ మంత్రి సీదిరి అప్పలరాజును అడ్డుకున్న పోలీసులు.

నామినేషన్ కేంద్రానికి వెళ్లకుండా అడ్డగింత - ఉద్రిక్తత..

పలాస,పలాస-కాశీబుగ్గ మున్సిపాలిటీ ఎన్నికల నామినేషన్ల వేళ ఉద్రిక్తత చోటుచేసుకుంది. వైసీపీ చైర్మన్ అభ్యర్థితో పాటు 36 వార్డుల కౌన్సిలర్ అభ్యర్థులకు మద్దతుగా నామినేషన్ కేంద్రానికి వెళ్తున్న మాజీ మంత్రి సీదిరి అప్పలరాజును పోలీసులు అడ్డుకున్నారు.శనివారం మాజీ మంత్రి సీదిరి అప్పలరాజు,ఎమ్మెల్సీ కుంభ రవిబాబు,వైసీపీ ఎన్నికల పరిశీలకులు ఎన్ని ధనుంజయ్ నామినేషన్ కేంద్రానికి వెళ్తుండగా కాశీబుగ్గ పోలీసులు అడ్డుకున్నారు.మొదట కాశీబుగ్గ పెట్రోల్ బంక్ వద్ద,తర్వాత పలాస జీడిపిక్క బొమ్మ వద్ద పోలీసులు వారిని నిలువరించారు.శాంతిభద్రతల దృష్ట్యా అనుమతి లేదని పోలీసులు స్పష్టం చేయడంతో వైసీపీ నేతలకు, పోలీసులకు మధ్య వాగ్వివాదం చోటుచేసుకుంది.ప్రశాంతంగా ఉన్న పరిస్థితి ఒక్కసారిగా రాజకీయంగా వేడెక్కింది..ప్రజాస్వామ్యంలో సామాన్యులకు అండగా ఉండాల్సిన పోలీసులు తననే టార్గెట్ చేసి ఎందుకు అడ్డుకుంటున్నారని మాజీ మంత్రి సీదిరి అప్పలరాజు ప్రశ్నించారు. చివరకు పోలీసులు అనుమతి నిరాకరించడంతో మాజీ మంత్రి తన నాయకులతో కలిసి వెనుదిరిగారు.