కేరాసింగిలో పారిశుద్ధ్య నిర్వహణ పై అవగాహన

మెలియాపుట్టి. గ్రామాల్లో పారిశుద్ధ్య నిర్వహణను మెరుగుపరచడంతోపాటు, తడి, పొడి చెత్తను వేర్వేరుగా సేకరించడంపై ప్రతి ఒక్కరికీ అవగాహన కల్పించాలని డిప్యూటీ ఎంపీడీవో వి. అప్పయ్య సూచించారు. శనివారం మెలియాపుట్టి మండలం కేరాసింగి గ్రామపంచాయతీలో వర్మీ కంపోస్ట్ తయారీ, ఇంటింటికీ చెత్త సేకరణ, తడి, పొడి చెత్త వేరు చేసే విధానాలపై పంచాయతీ కార్యదర్శులు, గ్రీన్ అంబాసిడర్లకు అవగాహన కార్యక్రమం నిర్వహించారు.ఈ సందర్భంగా డిప్యూటీ ఎంపీడీవో మాట్లాడుతూ.. తడి చెత్తను, పొడి చెత్తను వేర్వేరుగా సేకరించడం ద్వారా చెత్త నిర్వహణ సులభతరమవుతుందని తెలిపారు. తడి చెత్తతో సేంద్రియ ఎరువైన వర్మీ కంపోస్ట్ తయారు చేసుకోవచ్చని వివరించారు. ఇంటింటికీ వెళ్లి చెత్త సేకరించే సమయంలో ప్రజలకు తడి, పొడి చెత్తను వేర్వేరుగా అందించే విధానంపై అవగాహన కల్పించాలని సూచించారు.పంచాయతీ కార్యదర్శులు, గ్రీన్ అంబాసిడర్లు సమన్వయంతో పనిచేస్తూ గ్రామాల్లో పరిశుభ్రతకు ప్రాధాన్యమివ్వాలని పేర్కొన్నారు. చెత్తను ఎక్కడపడితే అక్కడ వేయకుండా, నిర్దేశించిన పద్ధతిలో సేకరించి నిర్వహించేలా ప్రజలకు అవగాహన కల్పించాలని సూచించారు.