కళ్యాణదుర్గం లో 24 వ వార్డు లో మౌలిక వసతులు పరిశీలన.

కళ్యాణదుర్గం: పట్టణంలోని వార్డుల్లో మౌలిక వసతుల అభివృద్ధికి ప్రాధాన్యం ఇస్తూ ప్రజలకు మెరుగైన సౌకర్యాలు కల్పించడమే లక్ష్యంగా కృషి చేస్తున్నట్లు 24వ వార్డు కౌన్సిలర్ పార్వతి రామన్న తెలిపారు. ఎమ్మెల్యే అమిలినేని సురేంద్రబాబు ఆదేశాల మేరకు కళ్యాణదుర్గం మున్సిపాలిటీ పరిధిలోని 24వ వార్డులో ఆమె పర్యటించి వివిధ ప్రాంతాల్లో నెలకొన్న సమస్యలను పరిశీలించారు. ముఖ్యంగా డ్రైనేజీ వ్యవస్థ, వీధి దీపాలు, సిమెంట్ రోడ్ల పరిస్థితిని క్షేత్రస్థాయిలో పరిశీలించి స్థానిక ప్రజల నుంచి సమస్యలను అడిగి తెలుసుకున్నారు. ఈ సందర్భంగా కోటవీధిలో పర్యటించిన కౌన్సిలర్ స్థానిక నివాసితులతో మాట్లాడి రోజువారీ జీవితంలో ఎదుర్కొంటున్న ఇబ్బందులు, పారిశుద్ధ్య సమస్యలు, మురుగునీటి కాలువల పరిస్థితి, వీధి దీపాల నిర్వహణ, రహదారుల సమస్యల గురించి వివరాలు సేకరించారు. ప్రజలు ఎదుర్కొంటున్న సమస్యలను ప్రత్యక్షంగా తెలుసుకుని వాటి పరిష్కారానికి చర్యలు తీసుకోవడం ప్రజాప్రతినిధిగా తన బాధ్యత అని పేర్కొన్నారు. వార్డులో డ్రైనేజీ వ్యవస్థ సక్రమంగా ఉండేలా, మురుగునీరు నిల్వ ఉండకుండా కాలువల నిర్వహణ చేపట్టేలా కృషి చేస్తామని తెలిపారు. అదేవిధంగా రాత్రివేళల్లో ప్రజలకు ఇబ్బందులు కలగకుండా వీధి దీపాలు సక్రమంగా పనిచేసేలా చూడటంతో పాటు అవసరమైన ప్రాంతాల్లో సిమెంట్ రోడ్ల అభివృద్ధికి ప్రాధాన్యం ఇస్తామని హామీ ఇచ్చారు. ప్రజా సమస్యలను సంబంధిత అధికారుల దృష్టికి తీసుకెళ్లి పరిష్కారానికి కృషి చేస్తామని, ప్రజలకు ఎల్లప్పుడూ అందుబాటులో ఉంటూ వార్డు అభివృద్ధికి నిరంతరం పనిచేస్తామని స్పష్టం చేశారు. ఎమ్మెల్యే అమిలినేని సురేంద్రబాబు నాయకత్వంలో కళ్యాణదుర్గం పట్టణాన్ని అభివృద్ధి పథంలో ముందుకు తీసుకెళ్లేందుకు కృషి చేస్తామని పేర్కొన్నారు. ఈ కార్యక్రమంలో డీలర్ రామాంజనేయులు, టీడీపీ యువ నాయకుడు బోయ మారుతి, స్కూల్ చైర్మన్ కొడిగి రాము, సంజీవరెడ్డి తదితరులు పాల్గొన్నారు.
కళ్యాణదుర్గం టౌన్ రిపోర్టర్ :- బోయ రంగస్వామి.