కారు ఢీకొని యువకుడు దుర్మరణం.

కోటబొమ్మాళి మండలం జాతీయ రహదారిలో పోడుగుపాడు గ్రామ వద్ద శనివారం మధ్యాహ్నం జరిగిన రోడ్డు ప్రమాదంలో శ్రీ జగన్నాధపురం పంచాయతీ, బిర్లంగి గ్రామానికి చెందిన ఆవల రాంబాబు (25) దుర్మరణం చెందాడు. రాంబాబు తన స్వగ్రామం బిర్లంగి గ్రామం నుంచి వచ్చి పొడుగుపాడు వైపు వెళ్లేందుకు రోడ్డు దాటుతుండగా టెక్కలి వైపు నుండి వేగంగా వస్తున్న కారు ఢీకొనడంతో ఈ ప్రమాదం జరిగింది. రాంబాబును ఢీకొన్న కారు అదుపుతప్పి డివైడర్ పై త్రుల్లి పడింది. సంఘటనలో రాంబాబు అక్కడికక్కడే మృతి చెందాడు. గొర్రెలు కాపరిగా పనిచేస్తున్న రాంబాబుకు తండ్రి భూషణరావు, తల్లి పారమ్మ, వివాహిత అయిన అక్క హారతి ఉన్నారు. సమాచారం తెలుసుకున్న పోలీసులు సంఘటన స్థలానికి చేరుకొని మృతదేహాన్ని స్థానిక సామాజిక ఆసుపత్రికి పోస్టుమార్టంకు తరలించి కేసు నమోదు చేసి దర్యాప్తు చేస్తున్నట్టు స్థానిక ఎస్సై వి. సత్యనారాయణ తెలిపారు. అవివాహతుడై, వివాద రహితుడై  అందరితో సరదాగా వ్యవహరించే రాంబాబు మృతి బిర్లంగి గ్రామాన్ని శోకసముద్రంలో ముంచేసింది. ఎంతో ఉద్ధరిస్తాడు అన్న కుమారుడు కళ్ళముందే కదలాడుతున్నట్లు ఉంటూ ఆకస్మికంగా మృతి చెందడంతో ఆ తల్లిదండ్రుల రోదన అరణ్య రోదన తీర్చలేనిది.