జర్నలిస్టు సమస్యలు పరిష్కరించాలి.

•  గాంధీ విగ్రహానికి జర్నలిస్టుల వినతిపత్రం

నరసన్నపేట, అక్టోబర్ 2 మేజర్ న్యూస్: జర్నలిస్టుల సమస్యలను పరిష్కరించడంలో కేంద్ర, రాష్ట్ర ప్రభుత్వాలు నిర్లక్ష్యంగా వ్యవహరిస్తున్నాయని నియోజకవర్గ ప్రెస్ క్లబ్ అధ్యక్షుడు తోట చంద్రమోహన్ దేవ్ ఆరోపించారు. గాంధీ జయంతి సందర్భంగా శుక్రవారం నరసన్నపేట తహసీల్దార్ కార్యాలయంలోని మహాత్మా గాంధీ విగ్రహానికి ఆయన ఆధ్వర్యంలో జర్నలిస్టులు వినతిపత్రం సమర్పించారు.

ఈ సందర్భంగా చంద్రమోహన్ దేవ్ మాట్లాడుతూ జర్నలిస్టులకు కల్పించాల్సిన సౌకర్యాల విషయంలో ప్రభుత్వాలు తగిన చర్యలు తీసుకోవడం లేదని ఆవేదన వ్యక్తం చేశారు. స్త్రీ శక్తి పథకం కింద మహిళలకు రాష్ట్రవ్యాప్తంగా బస్సు ప్రయాణ సౌకర్యం కల్పిస్తున్నప్పటికీ, జర్నలిస్టులకు కల్పిస్తున్న ప్రయాణ సౌకర్యాన్ని జిల్లాకే పరిమితం చేశారని అన్నారు.

జర్నలిస్టులకు ఇళ్ల స్థలాల పంపిణీతో పాటు ఇతర సంక్షేమ సౌకర్యాల కల్పనలోనూ ప్రభుత్వం చర్యలు తీసుకోవాలని కోరారు. ఇటీవల సోషల్ మీడియా ఇన్‌ఫ్లుయెన్సర్లకు ప్రోత్సాహకాలు అందించే అంశంపై ప్రభుత్వం దృష్టి సారిస్తుండగా, జర్నలిస్టుల ఉపాధి, సంక్షేమ సమస్యల పరిష్కారంలో మాత్రం నిర్లక్ష్యం చూపుతోందని ఆయన ఆరోపించారు.

రాష్ట్రంలో అక్రిడిటేషన్ కలిగిన జర్నలిస్టులకు కనీస వేతనం అమలు చేయాలని, అర్హులైన జర్నలిస్టులందరికీ ఇళ్ల స్థలాలు మంజూరు చేయాలని ప్రభుత్వాన్ని డిమాండ్ చేశారు. జర్నలిస్టుల సమస్యల పరిష్కారానికి తక్షణ చర్యలు తీసుకోవాలని కోరుతూ మహాత్మా గాంధీ విగ్రహానికి, నరసన్నపేట తహసిల్దార్ సత్యనారాయణకు  వినతిపత్రం సమర్పించారు.
కార్యక్రమంలో ప్రింట్, ఎలక్ట్రానిక్ మీడియా ప్రతినిధులు పాల్గొన్నారు.