గంజాయి పట్టివేత: ఇద్దరు అరెస్టు..!! ---వ్యాన్‌ స్వాధీనం
ఆనందపురం, సూర్య : మండలంలోని దుక్కువానిపాలెం టోల్‌గేటు సమీపంలో బుధవారం అర్ధరాత్రి అధికారులు గంజాయిని పట్టుకున్నారు. తనిఖీల్లో భాగంగా అనుమానాస్పదంగా వెళ్తున్న ఓ వ్యాన్‌ను అడ్డుకుని పరిశీలించగా, అందులో 150 ప్యాకెట్ల గంజాయి ఉన్నట్లు గుర్తించి స్వాధీనం చేసుకున్నారు. ఈ ఘటనకు సంబంధించి ఇద్దరు వ్యక్తులను అదుపులోకి తీసుకుని, వ్యాన్‌ను స్వాధీనం చేసుకున్నారు.
రెవెన్యూ, నిఘా విభాగం అధికారులు సంయుక్తంగా తనిఖీలు నిర్వహిస్తున్న సమయంలో ఈ గంజాయి పట్టుబడినట్లు తెలిసింది. పట్టుబడిన గంజాయి ఎక్కడి నుంచి తీసుకొస్తున్నారు? ఎక్కడికి తరలిస్తున్నారు? దీని వెనుక మరెవరైనా ఉన్నారా? అనే కోణాల్లో అధికారులు ఆరా తీస్తున్నారు. పట్టుబడిన ఇద్దరు వ్యక్తులతో పాటు వ్యాన్‌ను ఆనందపురం పోలీసులకు అప్పగించారు. పోలీసులు కేసు నమోదు చేసి దర్యాప్తు చేస్తున్నారు. గంజాయి పరిమాణం, దాని విలువ, నిందితుల వివరాలపై అధికారిక సమాచారం వెలువడాల్సి ఉంది.
రిపోర్టర్ : శ్రీనివాస్, ఆనందపురం, విశాఖపట్నం.
