గాంధీజీ జయంతి వేడుకల్లో మాజీ సైనికుల సేవా స్ఫూర్తి: పేదలకు దుప్పట్లు పంపిణీ

బొబ్బిలి, అక్టోబర్ 02: మేజర్ న్యూస్:

మహాత్మా గాంధీ 157వ జయంతి వేడుకలను పురస్కరించుకుని బొబ్బిలి పట్టణంలోని చీపురుపల్లి వీధిలో గల గాంధీ విగ్రహం వద్ద వీర బొబ్బిలి మాజీ సైనికుల సంఘం ఆధ్వర్యంలో సేవా కార్యక్రమాలు ఘనంగా నిర్వహించారు. దేశ స్వాతంత్ర్య సమరయోధుడు మహాత్మా గాంధీ చూపిన సత్యం, అహింస, శాంతి, ఐక్యత మార్గాలను స్మరించుకుంటూ మాజీ సైనికులు ఈ కార్యక్రమాన్ని నిర్వహించారు.ఈ కార్యక్రమానికి ముఖ్య అతిథిగా స్థానిక ఎమ్మెల్యే బేబినాయన హాజరయ్యారు. ఈ సందర్భంగా వీర బొబ్బిలి మాజీ సైనికులు ఆయనకు ఘన స్వాగతం పలికారు. చిన్నారులు జాతీయ జెండాలతో ఎమ్మెల్యేకు స్వాగతం పలికారు. అనంతరం గాంధీ విగ్రహానికి ఎమ్మెల్యే పూలమాల వేసి ఘనంగా నివాళులర్పించారు. మహాత్మా గాంధీతో పాటు మాజీ ప్రధాని లాల్ బహదూర్ శాస్త్రి చిత్రపటాలకు కూడా పూలమాలలు వేసి గౌరవం తెలిపారు.
దేశ సేవ నుంచి సమాజ సేవ వరకు..
దేశ రక్షణ కోసం తమ జీవితంలోని విలువైన సంవత్సరాలను అంకితం చేసిన మాజీ సైనికులు పదవీ విరమణ అనంతరం కూడా సామాజిక సేవా కార్యక్రమాల్లో చురుగ్గా పాల్గొనడం అభినందనీయమని ఎమ్మెల్యే పేర్కొన్నారు. వీర బొబ్బిలి మాజీ సైనిక సంఘ అధ్యక్షులు బొమ్మినేని తిరుపతిరావు ను ఎమ్మెల్యే అభినందించారు. దేశానికి సైనికుల సేవ ఎంత విలువైనదో, సమాజంలోని నిరుపేదలు, నిరాశ్రయులు, అవసరమైన వారికి అండగా నిలవడం కూడా అంతే గొప్ప సేవ అని అన్నారు.
మాజీ సైనికులు చేపడుతున్న సేవా కార్యక్రమాలు సమాజానికి స్ఫూర్తిదాయకంగా నిలుస్తున్నాయని, భవిష్యత్తులో మరిన్ని ప్రజోపయోగ కార్యక్రమాలు నిర్వహించాలని ఎమ్మెల్యే ఆకాంక్షించారు. పేదలకు దుప్పట్లు పంపిణీ చేయడం ద్వారా మానవతా విలువలను చాటుతున్నారని ప్రశంసించారు.
మహాత్మా గాంధీ భారతదేశానికి సత్యం, అహింస, శాంతి, ఐక్యత వంటి మహోన్నత విలువలను అందించిన మహనీయుడని ఎమ్మెల్యే అన్నారు. ప్రజలందరూ ఐక్యంగా ఉంటే ఎలాంటి లక్ష్యాన్నైనా సాధించగలమనే విశ్వాసాన్ని గాంధీజీ దేశ ప్రజల్లో కల్పించారని పేర్కొన్నారు. గాంధీజీ జయంతిని కేవలం ఒక జయంతి కార్యక్రమంగా కాకుండా ఆయన ఆశయాలను ఆచరణలో పెట్టే రోజుగా భావించాలని, సమాజంలో శాంతి, సౌభ్రాతృత్వం, పరస్పర సహకారం పెంపొందించేందుకు ప్రతి ఒక్కరూ కృషి చేయాలని పిలుపునిచ్చారు.
అవసరమైన వారికి అండగా నిలవడం, సమాజంలో సేవా స్ఫూర్తిని పెంపొందించడం తమ బాధ్యతగా భావిస్తున్నామని మాజీ సైనికులు తెలిపారు. దేశ సరిహద్దులను కాపాడిన సైనికులు, పదవీ విరమణ అనంతరం కూడా ప్రజల మధ్య సేవా కార్యక్రమాలు నిర్వహించడం ద్వారా తమ దేశభక్తిని మరో రూపంలో చాటుతున్నారని పేర్కొన్నారు.
ఈ కార్యక్రమంలో వీర బొబ్బిలి మాజీ సైనికుల అధ్యక్షుడు బొమ్మినేని తిరుపతిరావు, పుల్లయ్య, మాజీ అధ్యక్షుడు సబ్బాన సతీష్ కుమార్, రంగు ముద్ర వెంకట జగదీష్, ఆర్. రామచంద్రరావు, కొల్లి జగన్నాథం, ఎగిరెడ్డి లక్ష్మీనాయుడు, కే. శ్రీనివాసరావు, గెంబలి శ్రీనివాసరావు, రామకృష్ణ, పి. సింహాచలం, తిరుపతిరావు, ఆర్. దామోదర్ రావు, యు.ధనంజయరావు, బంగారు నాయుడు, నారాయణరావు, సురేష్ బాబు, బొబ్బిలి అప్పలనాయుడు,ఈ శ్యాం బాబూ,ఈ రామకృష్ణ,తిరుమలరావు తదితర మాజీ సైనికులు పాల్గొన్నారు.