గాలివాన బీభత్సం.. నేలకొరిగిన అరటి తోటలు రెండో, మూడో కోత దశలో పంటకు తీవ్ర నష్టం.. రైతుల్లో ఆందోళన
అనంతపురం బ్యూరో: నార్పల మండలం గడ్డంనాగేపల్లి గ్రామంలో బుధవారం వీచిన బలమైన గాలులకు అరటి తోటలు తీవ్రంగా దెబ్బతిన్నాయి. స్వల్ప వర్షం అనంతరం ఒక్కసారిగా ఈదురుగాలులు బలంగా వీయడంతో పలు అరటి చెట్లు నేలకొరిగాయి.
రెండో, మూడో కోత దశలో ఉన్న అరటి పంట దెబ్బతినడంతో రైతులకు భారీగా నష్టం వాటిల్లింది. నెలల తరబడి పంట సాగు కోసం చేసిన పెట్టుబడులు, శ్రమ గాలివాన కారణంగా దెబ్బతినడంతో రైతులు ఆవేదన వ్యక్తం చేస్తున్నారు.
పంట చేతికందే సమయంలో ప్రకృతి వైపరీత్యం కారణంగా నష్టం వాటిల్లడంతో రైతులు తీవ్రంగా నష్టపోయామని వాపోతున్నారు. అధికారులు వెంటనే గడ్డంనాగేపల్లి గ్రామంలోని దెబ్బతిన్న అరటి తోటలను పరిశీలించి, పంట నష్టాన్ని అంచనా వేయాలని రైతులు కోరుతున్నారు. నష్టపోయిన రైతులకు ప్రభుత్వ పరంగా తగిన పరిహారం అందించి ఆదుకోవాలని విజ్ఞప్తి చేస్తున్నారు.
గాలివానకు పంట నష్టపోయిన రైతుల్లో ఆర్. నవీన్, కే. వెంకటేష్, ఎం. వెంకటనాయుడు, జీ. వెంకటయ్య తదితరులు ఉన్నారు.
