మాజీ మంత్రి యనమల రామకృష్ణుడికి తీవ్ర అస్వస్థత:

సూర్య బ్యూరో, కాకినాడ/అమరావతి: తెలుగుదేశం పార్టీ సీనియర్ నేత, ఉమ్మడి ఆంధ్రప్రదేశ్ మాజీ ఆర్థిక శాఖ మంత్రి యనమల రామకృష్ణుడు తీవ్ర అస్వస్థతకు గురయ్యారు. గురువారం ఆయనకు అకస్మాత్తుగా ఛాతీలో నొప్పి, తీవ్ర నీరసం రావడంతో కుటుంబ సభ్యులు వెంటనే కాకినాడలోని ఓ ప్రైవేట్ ఆసుపత్రికి తరలించారు. ప్రస్తుతం ఆసుపత్రిలోని వైద్యుల బృందం ఆయనకు ప్రత్యేక వార్డులో అత్యవసర వైద్య పరీక్షలు నిర్వహిస్తూ చికిత్స అందిస్తోంది.

వైద్యులతో మాట్లాడి ఆరా తీసిన సీఎం చంద్రబాబు:యనమల రామకృష్ణుడు ఆసుపత్రిలో చేరిన సమాచారం తెలిసిన వెంటనే ఆంధ్రప్రదేశ్ ముఖ్యమంత్రి నారా చంద్రబాబు నాయుడు స్పందించారు. కాకినాడ ఆసుపత్రి వైద్యులతో నేరుగా ఫోన్‌లో మాట్లాడిన ముఖ్యమంత్రి, యనమల ప్రస్తుత ఆరోగ్య పరిస్థితి మరియు అందిస్తున్న చికిత్స వివరాలను అడిగి తెలుసుకున్నారు. ఆయనకు మెరుగైన అత్యవసర వైద్య సేవలు అందించాలని వైద్యులను ఆదేశించారు. అనంతరం యనమల కుటుంబ సభ్యులతో మాట్లాడి ధైర్యం చెప్పిన సీఎం, పరిస్థితిని నిరంతరం పర్యవేక్షించాలని పార్టీ స్థానిక నేతలకు సూచించారు. రాష్ట్ర మంత్రి నారా లోకేశ్ సైతం ఆసుపత్రి వర్గాలతో మాట్లాడి ఆయన ఆరోగ్యం గురించి ఆరా తీశారు.

ఆసుపత్రికి చేరుకున్న ఎంపీ సానా సతీష్ బాబు:ముఖ్యమంత్రి ఆదేశాల మేరకు రాజ్యసభ ఎంపీ సానా సతీష్ బాబు హుటాహుటిన కాకినాడలోని ఆసుపత్రికి చేరుకున్నారు. యనమలకు అందుతున్న వైద్య సేవలను ఆయన దగ్గరుండి స్వయంగా పర్యవేక్షించారు. చికిత్సకు సంబంధించిన తాజా వివరాలపై వైద్యులతో చర్చించారు. కాగా, పార్టీ వ్యవస్థాపక రోజుల నుంచి కీలక నేతగా, మాజీ స్పీకర్‌గా, ఆర్థిక మంత్రిగా సేవలందించిన యనమల అస్వస్థతకు గురయ్యారన్న వార్తతో టీడీపీ శ్రేణులు, అభిమానులు ఆందోళనకు గురై పెద్ద ఎత్తున ఆసుపత్రి వద్దకు చేరుకుంటున్నారు. ప్రస్తుతం ఆయన పరిస్థితి నిలకడగానే ఉందని, మరికాసేపట్లో సమగ్ర హెల్త్ బులెటిన్ విడుదల చేస్తామని వైద్యులు తెలిపారు.