చంటి బిడ్డను ఎత్తుకొని వచ్చి నామినేషన్ దాఖలు చేసిన జడ్పిటిసి అభ్యర్థి మహాదేవి.

అనంతపురం: స్థానిక సంస్థల ఎన్నికల నేపథ్యంలో అనంతపురం జిల్లా పరిషత్ కార్యాలయంలో జడ్పీటీసీ స్థానాలకు నామినేషన్ల ప్రక్రియ కొనసాగుతోంది. శుక్రవారం మధ్యాహ్నం 2 గంటల సమయానికి మొత్తం 82 నామినేషన్లు దాఖలైనట్లు ఎన్నికల రిటర్నింగ్ అధికారి వెల్లడించారు. ఈ క్రమంలో శెట్టూరు మండల వైఎస్సార్ కాంగ్రెస్ పార్టీ జడ్పీటీసీ అభ్యర్థి కె. మహాదేవి తన చంటి బిడ్డను ఎత్తుకుని నామినేషన్ కేంద్రానికి చేరుకుని నామినేషన్ దాఖలు చేయడం ప్రత్యేకంగా నిలిచింది. కుటుంబ బాధ్యతలను నిర్వర్తిస్తూనే ప్రజాసేవ లక్ష్యంగా ఎన్నికల బరిలోకి దిగిన ఆమె, అధికారులకు తన నామినేషన్ పత్రాలను సమర్పించారు. ప్రజల ఆశీస్సులతో విజయం సాధించడమే తన లక్ష్యమని మహాదేవి ధీమా వ్యక్తం చేశారు. జిల్లా పరిషత్ కార్యాలయంలో వివిధ మండలాలకు చెందిన అభ్యర్థులు నామినేషన్లు సమర్పించేందుకు తరలివస్తుండటంతో ఎన్నికల సందడి నెలకొంది. ఎన్నికల అధికారులు నిబంధనల ప్రకారం నామినేషన్ల స్వీకరణ ప్రక్రియను కొనసాగిస్తున్నారు. శుక్రవారం మధ్యాహ్నం 2 గంటల వరకు 82 నామినేషన్లు దాఖలు కావడంతో ఎన్నికల పోటీపై ఆసక్తి పెరిగింది. శెట్టూరు జడ్పీటీసీ స్థానానికి మహాదేవి నామినేషన్ దాఖలు చేయడంతో మండలంలో ఎన్నికల రాజకీయాలు మరింత వేడెక్కనున్నాయి. రానున్న రోజుల్లో అభ్యర్థులు ప్రజల మద్దతు కూడగట్టుకునేందుకు ప్రచార కార్యక్రమాలను ముమ్మరం చేయనున్నారు. చివరకు ఓటర్లు ఎవరికి పట్టం కడతారనేది ఆసక్తికరంగా మారింది.
కళ్యాణదుర్గం టౌన్ రిపోర్టర్ :-రంగస్వామి.