ఎన్నికలకు సిద్ధంగా ఉండాలి

నేటి దినపత్రిక సూర్య బ్యూరో రాజమహేంద్రవరంరాజమహేంద్రవరం నగరపాలక ఎన్నికల నోటిఫికేషన్ ఏక్షణంలో వచ్చినా ఉత్తమ స్థాయిలో నిర్వహించేందుకు సన్నద్ధంగా ఉండాలని కమిషనర్ రాహుల్ మీనా పిలుపునిచ్చారు. నగరపాలక సంస్థ కార్యాలయంలోని కౌన్సిల్ హాల్ నందు వార్డు సచివాలయ ఉద్యోగులకు ఎన్నికల నిర్వహణపై శిక్షణా తరగతులు నిర్వహించారు. ఎన్నికల నోటిఫికేషన్‌ వచ్చిన తర్వాత తక్కువ సమయంలోనే ప్రక్రియ పూర్తిచేయవలసి ఉంటుందని.. కావున ముందస్తుగానే ఏర్పాట్లు పూర్తి చేసుకోవలసిందిగా సూచించారు. నోటిఫికేషన్‌కు ముందే అవసరమైన పనులు చేపడితే ఎన్నికల సమయంలో ఇబ్బందులు తగ్గుతాయని, అందుకే అవగాహన సదస్సులు నిర్వహిస్తున్నట్లు తెలిపారు. ఎన్నికల సంఘం మార్గదర్శకాలు, నిర్దేశకాలపై అధికారులు, ఉద్యోగులు పూర్తి అవగాహన ఉండాలని సూచించారు. పునర్విభజన జరిగిన వార్డుల వారీగా ఇంటింటికి తిరిగి పక్కా ఓటర్ల జాబితా సిద్ధం చేసుకోవాలన్నారు. అలాగే వార్డుల వారీగా ఎస్సీ, ఎస్టీ, బీసీ, మహిళా ఓటర్లను గుర్తించాలన్నారు. ఈసారి బ్యాలెట్‌ పెట్టెల ద్వారా ఎన్నికలు జరగనున్నందున ప్రతి అంశంలో అప్రమత్తంగా ఉండాలన్నారు.  

పోలింగ్ కేంద్రాలను గుర్తించాలి*

ఎన్నికల సన్నద్ధతలో భాగంగా నగరంలో పోలింగ్ స్టేషన్లను గుర్తించడంతో పాటు వాటిలో మౌలిక వసతులు కల్పించవలసి ఉందని కమిషనర్ రాహుల్ మీనా అన్నారు. ప్రతి పోలింగ్‌బూత్‌లో 1000 మంది ఓటర్లు ఉండేలా చూడాలని, ప్రతి ఓటరు నివాసం నుంచి రెండు కిలోమీటర్ల దూరంలో పోలింగ్‌ కేంద్రాలు ఉండేలా చర్యలు చేపట్టాలన్నారు. పాఠశాల విద్య, ఉన్నత విద్య, పురపాలక శాఖకు చెందిన పాఠశాలలతో పాటు ప్రభుత్వ భవనాలు, వార్డు సచివాలయాలు, వసతి గృహాలు, అంగన్వాడీ కేంద్రాల్లో పోలింగ్‌ స్టేషన్లు ఏర్పాటు చేస్తున్న నేపథ్యంలో సంబంధిత అధికారులు ప్రత్యేక దృష్టి సారించాలన్నారు. ఎక్కడా ఓటర్లకు ఎటువంటి అసౌకర్యం కలగకుండా చూడాలన్నారు. ముఖ్యంగా అన్ని పోలింగ్‌ కేంద్రాల వద్ద ర్యాంపుల నిర్మాణం తప్పనిసరిగా చేపట్టాలని.. విద్యుత్‌ సౌకర్యంతో పాటు ఫ్యాన్లు,  ఫర్నిచర్, తాగునీరు, టాయిలెట్లు తప్పనిసరిగా ఉండేలా ముందస్తు ఏర్పాట్లు చేయాలన్నారు. అనంతరం *అదనపు కమిషనర్ పి.వి.రామలింగేశ్వర్* మాట్లాడుతూ.. ఎన్నికలకు ముందు, ఎన్నికల సమయంలో, అనంతరం చేపట్టాల్సిన చర్యలపై స్పష్టమైన అవగాహన కల్పించారు. సమీక్షలో సిటీ ప్లానర్ జీవీఎస్ఎన్ మూర్తి, డిప్యూటీ సిటీ ప్లానర్ నాయుడు, వార్డు సచివాలయ ఉద్యోగులు పాల్గొన్నారు.