ఎన్నికల బరిలో తల్లీ కూతుర్లు * కూటమి తరపున పోటీ *

ఆమదాలవలస, సూర్య : ఆమదాలవలస మండలంలో కూటమి తరపున ఎన్నికల బరిలో తల్లి, కూతుర్లు పోటీ చేస్తున్నారు. ఆమదాలవలస మండల జడ్పిటిసి టిడిపి అభ్యర్థిగా తమ్మినేని సుజాత, కలివరం ఎంపీటీసీ అభ్యర్థిగా టిడిపి నుండి తమ్మినేని భారతమ్మ పోటీలో నిలుస్తున్నారు. తమ్మినేని భారతమ్మ మాజీ స్పీకర్ తమ్మినేని సీతారాంకు స్వయానా వదిన. భారతమ్మ కుమార్తె సుజాత ప్రస్తుతం ప్రత్యక్ష ఎన్నికల్లో పోటీలో నిలుస్తున్నారు. వీరిద్దరూ సుదీర్ఘ రాజకీయ అనుభవం ఉన్న కుటుంబం నుంచి వచ్చిన వారు కావడం విశేషం. తమ్మినేని భారతమ్మ ఎంపీపీగా ఎప్పటికీ ప్రజలకు సేవలు అందించారు. కూటమి తరపున స్థానిక ఎమ్మెల్యే కూన రవికుమార్ బలపరిచిన అభ్యర్థి కావడంతో కలివరం ఎంపీటీసీ గెలుపుపై ధీమా వ్యక్తం చేస్తున్నారు. మరోవైపు భారతమ్మ కుమార్తె తమ్మినేని సుజాత టిడిపి రాష్ట్ర ఉపాధ్యక్షురాలుగా ఉన్నారు. గతంలో ఈమె టిడిపి జిల్లా మహిళా అధ్యక్షురాలుగా పార్టీకి ఎనలేని సేవలు అందించారు. ఈమె కృషికి టిడిపి అధిష్టానం గుర్తించి, ఎమ్మెల్యే కూన రవికుమార్ ప్రతిపాదించడంతో జడ్పీటీసీగా ఆమదాలవలస మండలం ఎన్నికల బరిలో నిలిచారు. దివంగత తమ్మినేని శ్యామల రావు కుమార్తె కావడంతో ఈమె విజయంపై గ్రామాల్లో సందడి నెలకొంది.

రిపోర్టర్ : రాము, సరుబుజ్జి, ఆమదాలవలస, శ్రీకాకుళం జిల్లా.