ఎమ్మెల్యే సమక్షంలో టిడిపి లో చేరిక చంద్రబాబు అభివృద్ధి కార్యక్రమాలకు ఆకర్షితులై చేరినట్లు వెల్లడి.

కొత్తూరు అక్టోబర్ 02 : సూర్య ఆంధ్రప్రదేశ్ డెస్క్: శ్రీకాకుళం జిల్లా కొత్తూరు మండలంలో తెలుగుదేశం పార్టీలోకి చేరికలు జరిగాయి. మండలంలోని మెట్టూరు బిట్ వన్ గ్రామానికి చెందిన పలువురు గ్రామస్తులు అక్టోబర్ 2న పాతపట్నం ఎమ్మెల్యే మామిడి గోవిందరావు సమక్షంలో టీడీపీ తీర్థం పుచ్చుకున్నారు. గ్రామ మాజీ సర్పంచ్ అదపాక శంకరరావు, బర్రి గోవిందరావు ఆధ్వర్యంలో ఈ చేరికల కార్యక్రమం జరిగింది.

రాష్ట్రంలోని తెలుగుదేశం ప్రభుత్వం అమలు చేస్తున్న సంక్షేమ పథకాలు, అభివృద్ధి కార్యక్రమాలకు ఆకర్షితులై పార్టీలో చేరినట్లు కొత్తగా చేరిన వారు తెలిపారు. గ్రామాభివృద్ధి కోసం ప్రభుత్వంతో కలిసి పనిచేయాలనే ఉద్దేశంతోనే ఈ నిర్ణయం తీసుకున్నామని వారు పేర్కొన్నారు. ఈ సందర్భంగా శాసనసభ్యుడు, ప్రివిలేజ్ కమిటీ సభ్యుడైన మామిడి గోవిందరావు వారికి పార్టీ కండువాలు కప్పి సాదరంగా ఆహ్వానించారు.

ఈ సందర్భంగా ఎమ్మెల్యే మాట్లాడుతూ, పార్టీలో చేరిన వారు ఇకపై పార్టీ అభివృద్ధికి కృషి చేయాలని పిలుపునిచ్చారు. కార్యకర్తలందరూ సమష్టిగా పనిచేసి గ్రామస్థాయిలో పార్టీని బలోపేతం చేయాలని ఆయన సూచించారు. కొత్తూరు మండలంలో తెలుగుదేశం పార్టీకి పెరుగుతున్న ఆదరణకు ఈ చేరికలు నిదర్శనమని పార్టీ శ్రేణులు అభిప్రాయపడుతున్నాయి.