చిన్నారుల్లో నిమోనియా కట్టడికి ప్రత్యేక కార్యాచరణ.. గోడపత్రికను ఆవిష్కరించిన డీఎంహెచ్‌ఓ డాక్టర్ టి. వెంకటేశ్వర్లు

సూర్య న్యూస్ ఒంగోలు.

ఐదేళ్లలోపు చిన్నారుల్లో నిమోనియా వ్యాధిని అరికట్టే లక్ష్యంతో నవంబర్ 12 నుండి ఫిబ్రవరి 28, 2027 వరకు నిర్వహించనున్న ప్రత్యేక అవగాహన మరియు నివారణ కార్యక్రమం గోడపత్రికను జిల్లా వైద్య మరియు ఆరోగ్యశాఖాధికారి (డీఎంహెచ్‌ఓ) డాక్టర్ టి. వెంకటేశ్వర్లు గురువారం ఆవిష్కరించారు. ఒంగోలులోని తన ఛాంబర్‌లో నిర్వహించిన ఈ కార్యక్రమంలో ఆయన మాట్లాడుతూ, నిమోనియా వ్యాధి పట్ల తల్లిదండ్రులు అప్రమత్తంగా ఉండాలని సూచించారు. ఐదేళ్లలోపు పిల్లల్లో జలుబు, దగ్గు తీవ్రం కావడం, అధిక జ్వరం, వేగంగా శ్వాస తీసుకోవడం, శ్వాస తీసుకునేటప్పుడు పక్కటెముకలు (డొక్కలు) లోపలికి ఎగరవేయడం, ముక్కుపుటాలు ఎగరవేయడం, పాలు తాగలేకపోవడం వంటి లక్షణాలు కనిపిస్తే నిమోనియాగా అనుమానించాలని డాక్టర్ వెంకటేశ్వర్లు తెలిపారు. గాలి ద్వారా వ్యాపించే ఈ వ్యాధి పట్ల నిర్లక్ష్యం వహిస్తే శిశు మరణాలకు దారితీసే ప్రమాదం ఉందన్నారు. ఈ నెల 12 నుండి వచ్చే ఏడాది ఫిబ్రవరి 28 వరకు వైద్య సిబ్బంది గృహ సందర్శనలు నిర్వహిస్తారని, పిల్లల్లో పై లక్షణాలు కనిపిస్తే వెంటనే ఆశా వర్కర్లు లేదా ఏఎన్ఎంల ద్వారా సత్వర చికిత్స అందించాలని కోరారు.నిమోనియా నివారణ కోసం ప్రభుత్వం చిన్నారులకు ఉచితంగా న్యూమోనియా వ్యాక్సిన్ (PCV) అందిస్తోందని, దీనిని తప్పనిసరిగా వేయించడంతో పాటు పిల్లలకు సరైన పౌష్టికాహారం అందించడం ద్వారా వ్యాధిని నివారించవచ్చని పేర్కొన్నారు. కార్యక్రమంలో జిల్లా టీబీ కంట్రోల్ అధికారి డాక్టర్ బాలాజీ, ఇమ్యూనైజేషన్ అధికారి డాక్టర్ కమలశ్రీ, ఎఫ్‌డీపీ నోడల్ అధికారి డాక్టర్ శ్రావణ్, సాన్స్ ప్రోగ్రాం అధికారి డాక్టర్ నబీవల్లి, జిల్లా మాస్ మీడియా అధికారులు బెల్లం నరసింహారావు, డి. శ్రీనివాసులు, విక్టర్ బాబు, జవహర్ తదితర వైద్యశాఖ సిబ్బంది పాల్గొన్నారు.