చిలకలూరిపేట అభివృద్ధికి ప్రత్యేక ప్రాధాన్యం.. రూ.59 లక్షల పనులకు శంకుస్థాపన చేసిన ప్రత్తిపాటి
సూర్య న్యూస్ చిలకలూరిపేట:
పట్టణ అభివృద్ధికి ప్రత్యేక ప్రాధాన్యమిస్తూ మౌలిక వసతుల కల్పనకు పెద్దపీట వేస్తున్నామని శాసనసభ్యులు ప్రత్తిపాటి పుల్లారావు తెలిపారు.నియోజకవర్గ అభివృద్ధి ఒకెత్తయితే,చిలకలూరిపేట పట్టణ అభివృద్ధి మరో ఎత్తు అని పేర్కొన్నారు.పట్టణ ప్రజలకు మెరుగైన వసతులు కల్పించడమే లక్ష్యంగా ప్రభుత్వం పలు అభివృద్ధి కార్యక్రమాలను చేపడుతోందని వెల్లడించారు.శుక్రవారం చిలకలూరిపేట మున్సిపాలిటీ పరిధిలోని పలు వార్డుల్లో హెచ్‌ఏఎం నిధులు రూ.59 లక్షలతో చేపట్టనున్న సీసీ రోడ్లు,డ్రైనేజీ నిర్మాణ పనులకు ప్రత్తిపాటి పుల్లారావు స్థానిక నాయకులతో కలిసి శంకుస్థాపన చేశారు.ఈ సందర్భంగా ఆయన మాట్లాడుతూ పట్టణంలో రహదారులు,డ్రైనేజీ వ్యవస్థల అభివృద్ధితో పాటు తాగునీరు,వీధి దీపాలు,పారిశుధ్య నిర్వహణకు ప్రభుత్వం ప్రాధాన్యత ఇస్తోందన్నారు.ప్రజలకు మెరుగైన జీవన ప్రమాణాలు కల్పించడంతో పాటు ఆహ్లాదకరమైన వాతావరణాన్ని అందించేందుకు పార్కుల సుందరీకరణ,శ్మశానవాటికల అభివృద్ధికి చర్యలు తీసుకుంటున్నామని తెలిపారు.విద్య,వైద్య రంగాల్లోనూ ప్రజలకు మెరుగైన సేవలు అందించేందుకు ప్రభుత్వం కృషి చేస్తోందని పేర్కొన్నారు.పట్టణంలోని ప్రతి వార్డులో అవసరమైన మౌలిక సదుపాయాలను దశలవారీగా కల్పిస్తామని హామీ ఇచ్చారు.
శంకుస్థాపన చేసిన పనుల వివరాలు:
9వ వార్డులో నిదానంపాటి అమ్మవారి ఆలయం వద్ద రూ.9 లక్షలతో సీసీ రోడ్డు నిర్మాణం,11వ వార్డులో రూ.11 లక్షలతో సీసీ రోడ్డు నిర్మాణం,18వ వార్డులో రూ.10 లక్షలతో సీసీ రోడ్డు, డ్రైనేజీల నిర్మాణం చేపట్టనున్నారు.అదేవిధంగా 13వ వార్డు మొదటి లైనులో రూ.5 లక్షలతో సీసీ రోడ్డు,డ్రైనేజీల నిర్మాణం,అదే వార్డులో నాలుగో లైనులో రూ.9 లక్షలతో సీసీ రోడ్డు నిర్మాణం చేపట్టనున్నారు.14వ వార్డులో రూ.15 లక్షలతో సీసీ రోడ్లు, డ్రైనేజీల నిర్మాణ పనులకు ఎమ్మెల్యే శంకుస్థాపన చేశారు.
