బ్రాహ్మణ చెరువులో మట్టి దోపిడీ!

•  జేసీబీ, మూడు ట్రాక్టర్లతో యథేచ్ఛగా తరలింపు అధికారులు వచ్చేసరికి పరారీ..
• అండదండలపై అనుమానాలు!

భోగాపురం సూర్య: చెరువుల పరిరక్షణకు బాధ్యత వహించాల్సిన అధికారులు ఉన్నా.. అక్రమ మట్టి తరలింపును అడ్డుకునే నాథుడే కరువయ్యారా? భోగాపురం మండలం చాకివలస రెవెన్యూ పరిధిలోని బ్రాహ్మణ చెరువులో జరుగుతున్న మట్టి తరలింపు వ్యవహారం ఈ ప్రశ్నలకు తావిస్తోంది. జేసీబీతో పాటు మూడు ట్రాక్టర్లను ఉపయోగించి చెరువులోని మట్టిని తరలిస్తున్నట్లు సమాచారం. ఈ వ్యవహారంపై స్థానికంగా పలు అనుమానాలు వ్యక్తమవుతున్నాయి. చెరువులో మట్టి తరలింపు జరుగుతున్న విషయాన్ని తెలుసుకున్న రెవెన్యూ అధికారులు, పోలీసులు అక్కడికి చేరుకునేలోపే సంబంధిత వ్యక్తులు అక్కడి నుంచి వెళ్లిపోయినట్లు తెలిసింది. అనంతరం సమీప ప్రాంతాల్లో జేసీబీ, ట్రాక్టర్ల కోసం గాలించినప్పటికీ అవి కనిపించక పోవడంతో అధికారులు వెనుదిరిగినట్లు రెవెన్యూ ఇన్‌స్పెక్టర్ వేణుగోపాల్ తెలిపారు. అధికారులు వచ్చే సమాచారం ముందుగానే అందుతుందా? లేక వారి కదలికలను గమనిస్తూ మట్టి తరలింపునకు పాల్పడుతున్నారా? అన్న సందేహాలు స్థానికంగా వ్యక్తమవుతున్నాయి. అయితే ఈ అనుమానాలపై అధికారికంగా నిర్ధారణ కావాల్సి ఉంది. * అక్రమాలకు అడ్డుకట్ట పడేనా? చెరువుల్లో మట్టి తరలింపునకు సంబంధించి నిబంధనలు పాటించాల్సిందేనని, ముందస్తు సమాచారం లేకుండా మట్టి తరలిస్తే సంబంధిత వ్యక్తులపై వాల్టా చట్టం ప్రకారం క్రిమినల్ కేసులు నమోదు చేస్తామని రెవెన్యూ ఇన్‌స్పెక్టర్ వేణుగోపాల్ హెచ్చరించారు. చెరువుల సహజ వనరులను కాపాడాల్సిన బాధ్యత అధికారులపై ఉంది. బ్రాహ్మణ చెరువులో మట్టి తరలింపు వ్యవహారంపై సమగ్ర విచారణ జరిపి, నిబంధనల ఉల్లంఘన జరిగినట్లు తేలితే బాధ్యులపై చర్యలు తీసుకోవాలని స్థానికులు కోరుతున్నారు.