భవానీ అలంకారంలో శ్రీ రాజరాజేశ్వరి అమ్మవారు దర్శనం

నెల్లూరు కల్చరల్ మేజర్ న్యూస్  :       నెల్లూరు నగరంలోని దుర్గామిట్టలో కొలువైన శ్రీ రాజరాజేశ్వరి అమ్మవారి దేవస్థానంలో శరన్నవరాత్రి మహోత్సవాలు భక్తిశ్రద్ధలతో ఘనంగా జరుగుతున్నాయి. ఉత్సవాల్లో భాగంగా మంగళవారం నాడు శ్రీ రాజరాజేశ్వరి అమ్మవారు 'శ్రీ భవానీ' అలంకారంలో భక్తులకు దివ్య దర్శనమిచ్చారు. ఈ విశేష భవానీ అలంకారానికి ఉభయకర్తలుగా మాగుంట సోదరులు వ్యవహరించారు. అనంతరం ఆలయంలో శాస్త్రోక్తంగా సంపుటీకరణ చండీ హోమం నిర్వహించగా, నెల్లూరుకు చెందిన ముంగమూరు శ్రీహరి రెడ్డి, రోహిణి దంపతులు ఉభయకర్తలుగా పూజల్లో పాల్గొన్నారు.  అమ్మవారి ఆలయ ప్రత్యేక పుష్పాలంకారానికి  కోటంరెడ్డి గిరిధర్ రెడ్డి, సరిత దంపతులు ఉభయకర్తలుగా వ్యవహరించగా, భక్తుల కోసం ఆలయ ప్రాంగణంలో ప్రత్యేక సాంస్కృతిక కార్యక్రమాలను ఏర్పాటు చేశారు.
సాయంత్రం నెల్లూరు రూరల్ శాసన సభ్యులు కోటంరెడ్డి శ్రీధర్ రెడ్డి, సుజిత దంపతులు అమ్మవారిని దర్శించుకుని పట్టువస్త్రాలు సమర్పించి ప్రత్యేక పూజలు జరిపారు. ఈ సందర్భంగా ఆలయ కార్యనిర్వహణాధికారి నూతలపాటి శ్రీధర్ నాయుడు, ఆలయ చైర్మన్  ఏలూరు శిరీష, ధర్మకర్తల మండలి సభ్యులు వారికి ఆలయ మర్యాదలతో ఘన స్వాగతం పలికారు. ఈ ఉత్సవ కార్యక్రమాలను ఆలయ సహాయ కమిషనరు, కార్యనిర్వహణాధికారి  శ్రీధర్ నాయుడు, ముఖ్య ఉత్సవ అధికారి కోవూరు జనార్ధన్ రెడ్డి, ఆలయ చైర్మన్ శ్రీమతి ఏలూరు శిరీష పర్యవేక్షించారు.