భక్తులకు సౌకర్యవంతమైన దర్శనమే లక్ష్యం
• సామాన్య భక్తులకు మెరుగైన దర్శన ఏర్పాట్లు
- రద్దీ నియంత్రణకు ప్రత్యేక చర్యలు.. భద్రతకు పెద్దపీట
- ఉత్సవాల నిర్వహణకు పటిష్ట ఏర్పాట్లు: దేవాదాయ శాఖ కమిషనర్ రామచంద్ర మోహన్
ఇంద్రకీలాద్రి, మేజర్ న్యూస్: శరన్నవరాత్రి ఉత్సవాలకు విచ్చేసే ప్రతి భక్తుడికి సౌకర్యవంతమైన, సురక్షితమైన దర్శనాన్ని కల్పించడమే లక్ష్యంగా దేవస్థానం, సంబంధిత అధికారులు సమన్వయంతో చర్యలు చేపడుతున్నారని రాష్ట్ర దేవాదాయ శాఖ కమిషనర్ రామచంద్ర మోహన్ తెలిపారు. సోమవారం ఇంద్రకీలాద్రిపై మీడియాతో మాట్లాడుతూ, భక్తులకు ఎలాంటి అసౌకర్యం కలగకుండా అమ్మవారి దర్శనం సజావుగా జరిగేలా ప్రత్యేక ఏర్పాట్లు చేస్తున్నట్లు వెల్లడించారు. గౌరవ రాష్ట్రపతి పర్యటనకు సంబంధించి కట్టుదిట్టమైన ఏర్పాట్లు చేపడుతున్నామని, మూలా నక్షత్రం రోజున రాష్ట్ర ముఖ్యమంత్రి నారా చంద్రబాబు నాయుడు కుటుంబ సభ్యులతో కలిసి అమ్మవారికి పట్టు వస్త్రాలు సమర్పించనున్నారని తెలిపారు. నవరాత్రి ఉత్సవాల సందర్భంగా అమ్మవారి దర్శనానికి పెద్ద సంఖ్యలో భక్తులు తరలివచ్చే అవకాశం ఉన్నందున, వారి రాకపోకలకు ఇబ్బందులు కలగకుండా అవసరమైన ఏర్పాట్లు చేసినట్లు కమిషనర్ పేర్కొన్నారు. వీఐపీ భక్తులతో పాటు సామాన్య భక్తులకు కూడా ప్రాధాన్యతనిస్తూ, రద్దీకి అనుగుణంగా దర్శన ఏర్పాట్లను పర్యవేక్షిస్తున్నామని తెలిపారు. భక్తులు ఎక్కువసేపు ఇబ్బందులు పడకుండా దర్శన ప్రక్రియ సజావుగా సాగేందుకు అధికారులు ప్రత్యేక శ్రద్ధ తీసుకుంటున్నారని చెప్పారు. ఉత్సవాల సమయంలో భక్తుల భద్రతకు అత్యంత ప్రాధాన్యతనిస్తూ తగిన పోలీసు బందోబస్తు ఏర్పాటు చేయడంతో పాటు నిరంతర పర్యవేక్షణ చేపడుతున్నట్లు వివరించారు. ప్రతి భక్తుడికి ప్రశాంతమైన వాతావరణంలో అమ్మవారి దర్శనం కల్పించేందుకు అన్ని శాఖల అధికారులు సమన్వయంతో పనిచేస్తున్నారని రామచంద్ర మోహన్ వెల్లడించారు.
