బాలల దినోత్సవ వేడుకల్లో నెహ్రూకు ఘన నివాళి

కడియం, మేజర్ న్యూస్ :కడియం మండలం బుర్రిలంక గ్రామంలో కాంగ్రెస్ కార్యాలయంలో బాలల దినోత్సవాన్ని పురస్కరించుకుని భారత తొలి ప్రధాని పండిట్ జవహర్‌లాల్ నెహ్రూ 137 జయంతి వేడుకలు నిర్వహించారు. ఈ సందర్భంగా రాజమహేంద్రవరం కాంగ్రెస్ పార్టీ రూరల్ కోఆర్డినేటర్ తాడాల కొండరాజు నెహ్రూ చిత్రపటానికి పూలమాల వేసి ఘనంగా నివాళులర్పించారు.
అనంతరం ఆయన మాట్లాడుతూ.. పిల్లలంటే నెహ్రూకు ఎంతో ఇష్టమని, అందుకే ఆయన జయంతిని దేశవ్యాప్తంగా బాలల దినోత్సవంగా జరుపుకుంటున్నామని తెలిపారు. బాలలే దేశ భవిష్యత్తు అని, ప్రతి చిన్నారికి నాణ్యమైన విద్య, మెరుగైన ఆరోగ్యం, సమాన అవకాశాలు కల్పించాల్సిన బాధ్యత సమాజంపై ఉందన్నారు. పిల్లల ప్రతిభను ప్రోత్సహిస్తూ, వారి ఉజ్వల భవిష్యత్తుకు ప్రతి ఒక్కరూ కృషి చేయాలని పిలుపునిచ్చారు. నేటి బాలలే రేపటి పౌరులంటూ నినాదాలు చేశారు. ఈ కార్యక్రమంలో కడియం మండల కాంగ్రెస్ అధ్యక్షులు పిఎస్ఎన్ రాజు తీగిరెడ్డి నాగబాబు తీగి రెడ్డి ప్రసాదు తదితరులు పాల్గొన్నారు.