ఆర్నాబ్ తుఫాను నేపథ్యంలో రైతులు అప్రమత్తంగా ఉండాలి - మండల వ్యవసాయ అధికారి జి. వాణి.

బిక్కవోలు మేజర్ న్యూస్. ఆర్నాబ్ తుఫాను ప్రభావంతో ఈ నెల 27, 28, 29, 30 తేదీల్లో వర్షాలు కురిసే అవకాశం ఉన్న నేపథ్యంలో బిక్కవోలు మండలంలోని వరి సాగు రైతులు అప్రమత్తంగా ఉండాలని మండల వ్యవసాయ అధికారి జి. వాణి సూచించారు. తుఫాను ప్రభావం వల్ల పంట నష్టపోకుండా ముందస్తు జాగ్రత్తలు తీసుకోవాలని ఆమె రైతులకు విజ్ఞప్తి చేశారు.
కోతకు సిద్ధంగా ఉన్న వరి పొలాల్లో నీరు నిల్వ ఉండకుండా మురుగునీటి కాలువలు, బోదెలను శుభ్రపరిచి, పొలాల్లోని నీటిని పూర్తిగా బయటకు వెళ్లేలా చర్యలు చేపట్టాలని సూచించారు. వర్షపు నీరు సులభంగా బయటకు వెళ్లేందుకు అవసరమైన మార్గాలను ఏర్పాటు చేసుకోవాలన్నారు.
తుఫాను ప్రభావం ఉండే నాలుగు రోజుల పాటు, అంటే ఈ నెల 27 నుంచి 30వ తేదీ వరకు వరి కోతలను వాయిదా వేసుకోవాలని సూచించారు. ఇప్పటికే కోతలు కోసిన రైతులు ధాన్యాన్ని సురక్షిత ప్రాంతాలకు తరలించాలని, పొలాల్లోని నీరు నిలిచే ప్రాంతాల్లో ధాన్యాన్ని నిల్వ ఉంచరాదని స్పష్టం చేశారు.
దాళ్వా సాగు కోసం విత్తన ధాన్యంగా ఉపయోగించేందుకు ఉంచిన ధాన్యాన్ని తేమ తగలకుండా సురక్షిత ప్రదేశంలో భద్రపరచుకోవాలని తెలిపారు. తుఫాను ప్రభావం ఉన్న సమయంలో నాలుగు రోజుల పాటు పురుగుమందుల పిచికారీకి దూరంగా ఉండాలని సూచించారు.
తుఫాను ప్రభావం తగ్గిన అనంతరం పొలాల్లో నిలిచిన నీటిని బయటకు తొలగించి, పంట పరిస్థితిని పరిశీలించిన తర్వాత వ్యవసాయ శాఖ అధికారుల సూచనలు పాటించాలని మండల వ్యవసాయ అధికారి జి. వాణి రైతులకు విజ్ఞప్తి చేశారు.