44 కోట్లతో మాస్టర్ ప్లాన్ రోడ్డుకు శంకుస్థాపన -పద్మావతి అమ్మవారి ఆలయానికి ట్రాఫిక్ కష్టాలకు చెక్

ఎడ్యుకేషన్ స్టాఫ్ రిపోర్టర్ : తిరుచానూరు శ్రీపద్మావతి అమ్మవారి ఆలయానికి రాకపోకలను సులభతరం చేస్తూ, ట్రాఫిక్ సమస్యలకు శాశ్వత పరిష్కారం చూపేందుకు రూ.44 కోట్లతో 100 అడుగుల మాస్టర్ ప్లాన్ రోడ్డు నిర్మాణానికి మంగళవారం శంకుస్థాపన చేశారు. తిరుచానూరు పంచాయతీ పరిధిలో కొట్రమంగళం రోడ్డు జంక్షన్ నుంచి పూడి రోడ్డు జంక్షన్ వరకు నిర్మించనున్న ఈ రహదారికి జిల్లా కలెక్టర్ డా. ఎస్.వెంకటేశ్వర్, తుడా చైర్మన్ డాలర్ దివాకర్ రెడ్డి చంద్రగిరి ఎమ్మెల్యే పులివర్తి నాని సంయుక్తంగా భూమిపూజ నిర్వహించారు.ఈ సందర్భంగా కలెక్టర్ మాట్లాడుతూ... జాతీయ రహదారి నుంచి అమ్మవారి ఆలయానికి వెళ్లే మార్గంలో ఇరుకైన రోడ్ల వల్ల ఏర్పడుతున్న ట్రాఫిక్ ఇబ్బందులు కొత్త రోడ్డుతో తొలగిపోతాయన్నారు. రోడ్ల నిర్మాణంలో ఇళ్లు, నిర్మాణాలు కోల్పోయే వారికి నిబంధనల ప్రకారం పరిహారం, టీడీఆర్ బాండ్లు అందిస్తామన్నారు. తుడా చైర్మన్  మాట్లాడుతూ... తిరుమల శ్రీవారి దర్శనానికి వచ్చే భక్తులు తిరుచానూరు అమ్మవారిని కూడా దర్శించుకోవడంతో యాత్రికుల రద్దీ పెరుగుతోందని, బ్రహ్మోత్సవాలు, పంచమి తీర్థం వంటి రద్దీ రోజుల్లో మెరుగైన రవాణా, పార్కింగ్ సదుపాయాలు కల్పిస్తామన్నారు. చంద్రగిరి ఎమ్మెల్యే మాట్లాడుతూ... నియోజకవర్గంలో తుడా, టీటీడీ ఆధ్వర్యంలో 8 మాస్టర్ ప్లాన్ రోడ్ల పనులు ప్రారంభించామన్నారు. ఈ కార్యక్రమంలో టీటీడీ బోర్డు సభ్యుడు భానుప్రకాష్ రెడ్డి, యాదవ కార్పొరేషన్ చైర్మన్ నరసింహ యాదవ్, మాజీ కేంద్ర మంత్రి పనబాక లక్ష్మి, జాయింట్ కలెక్టర్ ఆర్.గోవిందరావు, స్థానిక ప్రజాప్రతినిధులు, అధికారులు పాల్గొన్నారు.

సీఎం గౌడ్ తిరుపతి స్టాప్ రిపోర్టర్