పోలీసులకు బందోబస్తు ఒత్తిడి.. • పండగ పూటా విశ్రాంతి కరువు!

మంచిర్యాల జిల్లా, సూర్య ప్రతినిధి : నియోజకవర్గంలో వరుస ఘటనలు, రాజకీయ వర్గాల మధ్య నెలకొంటున్న ఉద్రిక్తతల నేపథ్యంలో పోలీసులు శాంతిభద్రతల పరిరక్షణ కోసం నిరంతరం బందోబస్తు విధులు నిర్వహిస్తున్నారు. ఒకవైపు తీవ్ర ఎండ, మరోవైపు వరుస విధులతో పోలీసులు తీవ్ర ఒత్తిడిని ఎదుర్కొంటున్నారు. పండగ వేళ కూడా ప్రశాంతంగా భోజనం చేసే సమయం లేకుండా విధులు నిర్వర్తించాల్సిన పరిస్థితి నెలకొంది.

నిన్న రాత్రి బతుకమ్మ వేడుకల సందర్భంగా బందోబస్తు నిర్వహించిన పోలీసులు, తాళ్లపేటలో చోటుచేసుకున్న ఘర్షణ నేపథ్యంలో భద్రతా ఏర్పాట్లలో నిమగ్నమయ్యారు. తాజాగా మంచిర్యాల పట్టణంలో ఎమ్మెల్యే ప్రేమ్‌సాగర్ రావు వర్గానికి, మంతెన జగన్ మోహన్ రావుకు మధ్య ఎలాంటి ఘర్షణలు చోటుచేసుకోకుండా పోలీసులు భారీ బందోబస్తు ఏర్పాటు చేశారు.

రాజకీయ పరిణామాలు ఎలా ఉన్నా.. వాటి ప్రభావం పోలీసుల విధులపై పడుతోందనే అభిప్రాయాలు వ్యక్తమవుతున్నాయి. ప్రజల రక్షణ, శాంతిభద్రతల పరిరక్షణే లక్ష్యంగా పనిచేస్తున్న పోలీసులు వరుస బందోబస్తు విధులతో విశ్రాంతికి కూడా దూరమవుతున్నారు. రాజకీయ విభేదాలు ప్రజా ప్రశాంతతకు విఘాతం కలిగించకుండా నాయకులు సంయమనం పాటించాలని, శాంతిభద్రతల పరిరక్షణలో పోలీసులకు సహకరించాలని పలువురు అభిప్రాయపడుతున్నారు. పోలీసులపై అదనపు పని ఒత్తిడి తగ్గేలా రాజకీయ నాయకులు, ప్రజలు బాధ్యతాయుతంగా వ్యవహరించాల్సిన అవసరం ఉందని పేర్కొంటున్నారు.