ధరణి, భూ భారతి చర్చకు ప్రభుత్వం భయపడింది

సూర్య ప్రతినిధి, హైదరాబాద్ :ధరణి, భూ భారతి పోర్టల్స్‌పై శాసనసభలో చర్చించేందుకు కాంగ్రెస్ ప్రభుత్వం భయపడి పారిపోయిందని బీజేపీ శాసనసభాపక్ష నేత ఏలేటి మహేశ్వర్‌రెడ్డి తీవ్రస్థాయిలో విమర్శించారు. ధరణి పోర్టల్‌లో జరిగిన అక్రమాలపై నిర్వహించిన ఫోరెన్సిక్ ఆడిట్ నివేదికను ప్రభుత్వం ఎందుకు బయటపెట్టడం లేదని, అందులో జరిగిన అవినీతిపై ఎలాంటి చర్యలు ఎందుకు తీసుకోవడం లేదని ఆయన ప్రశ్నించారు. కాంగ్రెస్, బీఆర్ఎస్ పార్టీల మధ్య ఉన్న లోపాయికారీ ఒప్పందం వల్లే ఈ అక్రమాలపై చర్యలు తీసుకోవడం లేదని ఆరోపించారు.

ధరణి, భూ భారతిలలో చోటుచేసుకున్న అక్రమాలు, భూ కుంభకోణాలపై హైకోర్టు సిట్టింగ్ జడ్జితో సమగ్ర విచారణ జరిపించాలని ఏలేటి డిమాండ్ చేశారు. అలాగే 22A (నిషేధిత భూముల) జాబితాలో అన్యాయంగా చేర్చిన ప్రైవేటు భూములను వెంటనే తొలగించి, బాధితులకు విముక్తి కలిగించాలని కోరారు. ధరణి, భూ భారతి అక్రమాల వెనుక ఉన్న సూత్రధారుల అసలు రంగు బయటపడే వరకు తమ పోరాటం ఆగేది లేదని మహేశ్వర్‌రెడ్డి స్పష్టం చేశారు.