వికలాంగత ఎదుగుదలకు అడ్డుకాదు

పట్టుదల ఉంటే ఏదైనా సాధించొచ్చు: స్పీకర్ గడ్డం ప్రసాద్ కుమార్

వికారాబాద్ జిల్లా ప్రతినిధి మేజర్  న్యూస్ (సెప్టెంబర్ 23 ):శారీరక లోపం ఎదుగుదలకు ఏమాత్రం అడ్డుకాదని, పట్టుదల, ఆత్మవిశ్వాసంతో ముందుకు సాగితే ఏదైనా సాధించవచ్చని శాసనసభ స్పీకర్ గడ్డం ప్రసాద్ కుమార్ అన్నారు. దివ్యాంగులకు ప్రభుత్వం అన్ని విధాలుగా అండగా ఉంటుందని తెలిపారు.బుధవారం వికారాబాద్ పట్టణంలోని ప్రభుత్వ ఆసుపత్రి ప్రాంగణంలో వికలత్వ నిర్ధారణ పరీక్ష కేంద్రాన్ని స్పీకర్ గడ్డం ప్రసాద్ కుమార్ ప్రారంభించారు. ఈ సందర్భంగా ఆయన మాట్లాడుతూ సదరం శిబిరానికి వచ్చే దివ్యాంగులకు అవసరమైన మౌలిక వసతులు కల్పించాలని అధికారులను ఆదేశించారు.సెర్ప్ ద్వారా రూ.10 లక్షల నిధులతో ప్రభుత్వ ఆసుపత్రి ప్రాంగణంలో ప్రత్యేకంగా సదరం శిబిరాన్ని ఏర్పాటు చేయడం అభినందనీయమన్నారు. వికలత్వ నిర్ధారణ పరీక్షల కోసం వచ్చే వారికి ఈ కేంద్రం ఎంతో ఉపయోగపడుతుందని చెప్పారు. అర్హులైన ప్రతి దివ్యాంగుడికి సదరం సర్టిఫికెట్ అందేలా చర్యలు తీసుకోవాలని అధికారులను ఆదేశించారు.ప్రభుత్వ ఆసుపత్రికి వచ్చే రోగులకు మెరుగైన వైద్య సేవలు అందించాలని వైద్యులకు సూచించారు. ఆసుపత్రిలో అవసరమైన మందులు ఎల్లప్పుడూ అందుబాటులో ఉండేలా చర్యలు తీసుకోవాలని అధికారులకు తెలిపారు. ఆసుపత్రిలో ప్రస్తుతం ఉన్న సౌకర్యాలు, అవసరాలు, సిబ్బంది వివరాలను అధికారులను అడిగి తెలుసుకున్నారు.ఈ కార్యక్రమంలో జిల్లా కలెక్టర్ దీపక్ తివారి, జిల్లా ఎస్పీ స్నేహ మెహ్రా, అదనపు కలెక్టర్ ఉమాశంకర్ ప్రసాద్, అసిస్టెంట్ ట్రైనీ కలెక్టర్ సచిన్ బస్వరాజ్ గుట్టూరు, స్థానిక నాయకులు తదితరులు పాల్గొన్నారు.