శంషాబాద్ విమానాశ్రయంలో భారీగా కోకైన్ పట్టివేత

- రూ.24.5 కోట్ల విలువైన 4.9 కిలోల కొకైన్ స్వాధీనం.. ఒకరు అరెస్ట్

రాజీవ్‌గాంధీ అంతర్జాతీయ విమానాశ్రయం (ఆర్‌జీఐఏ)లో భారీగా కొకైన్‌ను తరలిస్తున్న ఓ ప్రయాణికుడిని డీఆర్‌ఐ హైదరాబాద్‌ జోనల్‌ యూనిట్‌ అధికారులు అరెస్ట్ చేశారు. అతని వద్ద నుంచి రూ.24.5 కోట్ల విలువైన 4.9 కిలోల కొకైన్‌ను స్వాధీనం చేసుకున్నారు.
డీఆర్‌ఐ అధికారులకు అందిన విశ్వసనీయ సమాచారంతో దోహా నుంచి హైదరాబాద్‌ వచ్చిన ఓ భారతీయ ప్రయాణికుడిపై నిఘా ఏర్పాటు చేశారు. అనంతరం అతని క్యాబిన్‌ బ్యాగేజీని తనిఖీ చేయగా ఏడు చాక్లెట్‌ ట్యూబ్‌లలో అనుమానాస్పద పదార్థం గుర్తించారు.
ట్యూబ్‌లను తెరిచి పరిశీలించగా చాక్లెట్ల మధ్య 207 అండాకారపు క్యాప్సూల్స్‌లో తెల్లటి పొడి పదార్థాన్ని దాచినట్లు గుర్తించారు. నార్కోటిక్‌ డ్రగ్‌ డిటెక్షన్‌ కిట్‌తో పరీక్షించగా అది కొకైన్‌గా నిర్ధారణ అయింది. మొత్తం 4.9 కిలోల కొకైన్‌ను జప్తు చేసి, నిందితుడిపై ఎన్‌డీపీఎస్‌ చట్టం–1985 కింద కేసు నమోదు చేశారు. కొకైన్‌ ఎక్కడి నుంచి వచ్చింది, ఎవరికి చేరవేయాల్సి ఉంది, ఈ అక్రమ రవాణా వెనుక మరెవరైనా ఉన్నారా అనే కోణాల్లో డీఆర్‌ఐ అధికారులు దర్యాప్తు చేస్తున్నారు.

- పోతుల నర్సింహా : మేజర్ న్యూస్, షాబాద్.