విమానంలో పెను ప్రమాదం తప్పిన వైనం.. కాక్పిట్లో పైలట్, కో-పైలట్ మధ్య ఘర్షణ
సూర్య అంతర్జాతీయ డెస్క్: దుబాయ్ నుంచి టెల్ అవివ్కు బయలుదేరిన ఫ్లైదుబాయ్ విమానం ప్రయాణంలో ఉండగా తీవ్ర ఉద్రిక్తత చోటుచేసుకుంది. విమానం గాల్లో ఎగురుతున్న సమయంలో దానిని తన నియంత్రణలోకి తీసుకునేందుకు కో-పైలట్ ప్రయత్నించగా, అతని దురుద్దేశాన్ని గ్రహించిన ప్రధాన పైలట్ అడ్డుకునేందుకు యత్నించడంతో వివాదం తలెత్తింది. ఈ క్రమంలో కాక్పిట్లోనే ఇద్దరి మధ్య పెనుగులాట జరిగి, కో-పైలట్ కత్తితో దాడికి పాల్పడటంతో ఒక్కసారిగా భయాందోళనకర వాతావరణం నెలకొంది.
ఈ అనూహ్య పరిణామాల కారణంగా సుమారు 34 వేల అడుగుల ఎత్తులో ప్రయాణిస్తున్న విమానం ఒక్కసారిగా 17 వేల అడుగుల దిగువకు పడిపోయింది. పైలట్ల మధ్య జరిగిన ఈ ఘర్షణతో విమానంలోని 174 మంది ప్రయాణికులు తీవ్ర భయభ్రాంతులకు గురయ్యారు. కాక్పిట్ నుంచి బయటకు వచ్చిన తర్వాత కూడా వీరి మధ్య గొడవ కొనసాగడంతో కొందరికి స్వల్ప గాయాలయ్యాయి.
అప్రమత్తమైన సిబ్బంది పరిస్థితిని అదుపులోకి తెచ్చే ప్రయత్నం చేయగా, చివరికి సౌదీ అరేబియాలో అత్యవసర ల్యాండింగ్ నిర్వహించడంతో పెను ప్రమాదం తప్పింది. ఈ ఘటనకు సంబంధించి పూర్తి వివరాలు తెలియాల్సి ఉంది.
