పూల పండుగ బతుకమ్మతో పోలీస్ కార్యాలయంలో పండుగ శోభ.. తెలంగాణ సంస్కృతి, సంప్రదాయాల పరిరక్షణ ప్రతి ఒక్కరి బాధ్యత: ఎస్పీ స్నేహ మెహ్రా

వికారాబాద్ జిల్లా ప్రతినిధి, మేజర్ న్యూస్: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సంబరాలు వికారాబాద్ జిల్లా పోలీస్ కార్యాలయంలో అంబరాన్నంటాయి. జిల్లా ఎస్పీ స్నేహ మెహ్రా, ఐపీఎస్ ఆధ్వర్యంలో శుక్రవారం పోలీస్ కార్యాలయ ప్రాంగణంలో బతుకమ్మ వేడుకలను ఘనంగా నిర్వహించారు. రంగురంగుల పూలతో అందంగా అలంకరించిన బతుకమ్మల చుట్టూ మహిళా పోలీస్ సిబ్బంది సంప్రదాయ దుస్తుల్లో చేరి బతుకమ్మ పాటలు పాడుతూ సందడి చేశారు. దీంతో పోలీస్ కార్యాలయ ప్రాంగణమంతా పండుగ శోభను సంతరించుకుంది.తెలంగాణ ఆడపడుచుల ఆత్మీయతకు, ప్రకృతితో మమేకమైన జీవన విధానానికి, పూల వైభవానికి ప్రతీకగా నిలిచే బతుకమ్మ పండుగను పోలీస్ అధికారులు, సిబ్బంది ఉత్సాహంగా జరుపుకున్నారు. విధి నిర్వహణలో నిత్యం ప్రజల భద్రత కోసం శ్రమించే పోలీస్ సిబ్బంది ఒకచోట చేరి సంప్రదాయ వేడుకల్లో పాల్గొనడం ప్రత్యేక ఆకర్షణగా నిలిచింది.ఈ సందర్భంగా జిల్లా ఎస్పీ స్నేహ మెహ్రా మాట్లాడుతూ… తెలంగాణ సంస్కృతి, సంప్రదాయాలకు బతుకమ్మ పండుగ ప్రతీక అని పేర్కొన్నారు. మన సంస్కృతీ సంప్రదాయాలను కాపాడుకోవడంతో పాటు వాటి విశిష్టతను భావితరాలకు అందించాల్సిన బాధ్యత ప్రతి ఒక్కరిపై ఉందన్నారు. ఇలాంటి పండుగలు సిబ్బందిలో పరస్పర స్నేహభావాన్ని, ఐక్యతను పెంపొందించడంతో పాటు సాంస్కృతిక విలువల పట్ల గౌరవాన్ని మరింత బలపరుస్తాయని తెలిపారు.ప్రజల రక్షణే లక్ష్యంగా విధులు నిర్వహిస్తున్న పోలీస్ సిబ్బంది, తెలంగాణ సంప్రదాయాలకు ప్రాధాన్యమిస్తూ బతుకమ్మ సంబరాల్లో పాల్గొనడం అభినందనీయమని ఆమె పేర్కొన్నారు. ఆనందోత్సాహాల మధ్య సాగిన ఈ వేడుకలు తెలంగాణ పూల పండుగ వైభవాన్ని చాటిచెప్పాయి.ఈ కార్యక్రమంలో జిల్లా అదనపు ఎస్పీ రాజేష్ మీనా, ఉమెన్ ఇన్‌స్పెక్టర్ ప్రమీలతో పాటు ఇతర పోలీస్ అధికారులు, మహిళా పోలీస్ సిబ్బంది, కార్యాలయ సిబ్బంది పాల్గొన్నారు.