కాకతీయ టెక్నో హైస్కూల్‌లో ఘనంగా ముందస్తు బతుకమ్మ సంబరాలు
కాకతీయ టెక్నో హైస్కూల్‌లో ఘనంగా ముందస్తు బతుకమ్మ సంబరాలు
సంస్కృతి, సంప్రదాయాలను చిన్ననాటి నుంచే విద్యార్థులకు అలవర్చాలి: జగ్గు మల్లారెడ్డి
సిద్దిపేట అర్బన్ :సిద్దిపేట జిల్లా కేంద్రంలోని కాకతీయ టెక్నో హైస్కూల్‌లో ముందస్తు బతుకమ్మ సంబరాలు అంబరాన్నంటాయి. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పురస్కరించుకుని పాఠశాలలో విద్యార్థులు, ఉపాధ్యాయులు ఉత్సాహంగా వేడుకలు నిర్వహించారు.
ఉదయం నుంచే విద్యార్థులు, ఉపాధ్యాయులు తంగేడు, చామంతి, గులాబీ, గునుగు తదితర రంగురంగుల పూలతో అందమైన బతుకమ్మలను పేర్చి వేడుకలకు ప్రత్యేక శోభను తీసుకొచ్చారు. అనంతరం సంప్రదాయ బతుకమ్మ పాటలు, నృత్యాలు, కోలాటాలతో సందడి చేస్తూ ఆనందోత్సాహాల మధ్య వేడుకలను జరుపుకున్నారు.ఈ కార్యక్రమానికి ముఖ్య అతిథిగా హాజరైన సిద్దిపేట జిల్లా ప్రైవేట్ పాఠశాలల అధ్యక్షుడు జగ్గు మల్లారెడ్డి మాట్లాడుతూ, తెలంగాణ రాష్ట్ర పండుగైన బతుకమ్మను ప్రతి ఒక్కరూ అత్యంత వైభవంగా జరుపుకోవాలని అన్నారు. విద్యార్థులకు చిన్ననాటి నుంచే మన సంస్కృతి, సంప్రదాయాలు, పండుగల విశిష్టతను తెలియజేస్తూ వాటిని గౌరవించేలా తీర్చిదిద్దాలని సూచించారు.అనంతరం విద్యార్థులు, ఉపాధ్యాయులు కోమటి చెరువు వద్దకు చేరుకుని బతుకమ్మ పాటలు పాడుతూ, నృత్యాలు చేస్తూ వేడుకలను కొనసాగించారు. సంప్రదాయబద్ధంగా బతుకమ్మలను నిమజ్జనం చేసి సంబరాలకు ముగింపు పలికారు.ఈ కార్యక్రమంలో పాఠశాల ప్రిన్సిపల్ కవిత, ఉపాధ్యాయులు, విద్యార్థుల తల్లిదండ్రులు, విద్యార్థులు పాల్గొన్నారు.
