చిన్నారిపై అఘాయిత్యం, హత్య కేసులో నిందితుడికి జీవిత ఖైదు.. పకడ్బందీ వాదనలు వినిపించిన పబ్లిక్ ప్రాసిక్యూటర్ రవీందర్కు డీసీపీ సన్మానం
సూర్య పెద్దపల్లి ప్రతినిధి
చిన్నారిపై అఘాయిత్యానికి పాల్పడి హత్య చేసిన కేసులో నిందితుడికి జీవిత ఖైదు పడేలా పకడ్బందీగా వాదనలు వినిపించిన పబ్లిక్ ప్రాసిక్యూటర్ డొంకెన రవీందర్ సేవలు అభినందనీయమని పెద్దపల్లి డీసీపీ బి. రాంరెడ్డి అన్నారు. కేసు విచారణలో కీలకంగా వ్యవహరించి, న్యాయస్థానంలో సాక్ష్యాధారాలను సమర్థవంతంగా ప్రవేశపెట్టినందుకు రవీందర్ను శుక్రవారం సుల్తానాబాద్ పోలీస్ స్టేషన్లో డీసీపీ ఘనంగా సన్మానించారు.ఈ సందర్భంగా డీసీపీ మాట్లాడుతూ చిన్నారులపై జరిగే అత్యంత క్రూరమైన నేరాల్లో బాధితులకు సత్వర న్యాయం అందేలా పోలీసులతో పాటు ప్రాసిక్యూషన్ విభాగం కూడా బాధ్యతాయుతంగా వ్యవహరించాల్సిన అవసరం ఉందన్నారు. పబ్లిక్ ప్రాసిక్యూటర్ రవీందర్ అంకితభావంతో, సమర్థవంతంగా వాదనలు వినిపించడం వల్లే నిందితుడికి న్యాయస్థానంలో కఠిన శిక్ష పడిందన్నారు. ఇలాంటి తీర్పులు చిన్నారులపై నేరాలకు పాల్పడే వారికి గట్టి హెచ్చరికగా నిలుస్తాయని పేర్కొన్నారు.నిందితులకు శిక్షలు పడేలా కేసులను సమర్థవంతంగా వాదించడంలో పబ్లిక్ ప్రాసిక్యూటర్ రవీందర్ చేస్తున్న కృషిని డీసీపీ అభినందించారు. కార్యక్రమంలో ఏసీపీ గజ్జి కృష్ణ, సీఐలు రంజిత్రావు, కొండపాక ప్రవీణ్కుమార్, ఎస్సైలు చంద్రకుమార్, అశోక్రెడ్డి, పోలీసు సిబ్బంది పాల్గొన్నారు.
