telanagana
చేతుల పరిశుభ్రతతోనే వ్యాధులు దూరం - డీఎంహెచ్‌వో నరేందర్ రాథోడ్‌
సూర్య నస్పూర్: ప్రపంచ చేతుల పరిశుభ్రత దినోత్సవం సందర్భంగా చేతులను సబ్బుతో శుభ్రంగా కడుక్కోవడం ద్వారా అనేక వ్యాధులను నివారించవచ్చని జిల్లా వైద్య ఆరోగ్యశాఖ అధికారి డాక్టర్ నరేందర్ రాథోడ్‌ తెలిపారు. గురువారం నస్పూర్ ప్రాథమిక ఆరోగ్య కేంద్రాన్ని సందర్శించిన ఆయన, పీహెచ్‌సీ వైద్యాధికారి డాక్టర్ ఎన్‌. వెంకటేష్‌తో కలిసి చేతుల పరిశుభ్రతపై ప్రజలకు అవగాహన కల్పించాలని సూచించారు. భోజనానికి ముందు, మరుగుదొడ్డి వినియోగించిన తర్వాత సబ్బుతో చేతులు శుభ్రం చేసుకోవాలని తెలిపారు. చేతుల పరిశుభ్రత పాటించకపోవడం వల్ల అతిసారం, వాంతులు, విరేచనాలు, కడుపునొప్పి, శ్వాసకోశ వ్యాధులు వచ్చే ప్రమాదం ఉందన్నారు. వ్యక్తిగత, పరిసరాల పరిశుభ్రతకు ప్రాధాన్యం ఇవ్వాలని సూచించారు. అనంతరం పీహెచ్‌సీలో వైద్య సేవలు, జాతీయ ఆరోగ్య కార్యక్రమాల అమలుపై సమీక్ష నిర్వహించారు. 30 ఏళ్లు పైబడిన వారందరికీ బీపీ, షుగర్‌ తదితర అసంక్రమిత వ్యాధుల పరీక్షలు నిర్వహించి, వ్యాధులను ముందుగా గుర్తించి ఆన్‌లైన్‌లో నమోదు చేయాలని ఆదేశించారు. రోగులకు క్రమం తప్పకుండా మందులు అందించాలని, కార్పొరేటర్ల సహకారంతో ప్రభావిత ప్రాంతాల్లో వైద్య శిబిరాలు నిర్వహించాలని సూచించారు.గర్భిణుల నమోదు, టీకాలు, ప్రభుత్వ ఆసుపత్రుల్లో ప్రసవాలపై దృష్టి సారించాలని, 108, అమ్మ ఒడి అంబులెన్స్‌ సేవలను అందుబాటులో ఉంచాలని తెలిపారు. ఆసుపత్రిలో పరిశుభ్రత పాటిస్తూ, స్వచ్ఛభారత్‌ కార్యక్రమంలో భాగంగా గదులను శుభ్రం చేసి ఫొటోలను పోర్టల్‌లో నమోదు చేయాలని ఆదేశించారు. ఈ కార్యక్రమంలో జిల్లా మాస్‌ మీడియా అధికారి బుక్కా వెంకటేశ్వర్‌, నర్సింగ్‌ అధికారి కవిత, ఆశా కార్యకర్తలు, వైద్య సిబ్బంది తదితరులు పాల్గొన్నారు.
