*అతి శబ్దంతో డీజేలు.. గుండె ఆరోగ్యానికి ముప్పు:డా. శివప్రసాద్
డిజేలన అధిక శబ్దంతో నిర్వహించడం వల్ల ప్రజల ఆరోగ్యంపై ప్రతికూల ప్రభావం పడే అవకాశం ఉందని తెలంగాణ హోమియోపతిక్ డాక్టర్స్ అసోసియేషన్ రాష్ట్ర అధ్యక్షులు, సహస్ర ఫౌండేషన్ చైర్మన్ డా. చినుకని శివప్రసాద్ తెలిపారు.
అధిక శబ్దానికి ఎక్కువసేపు గురికావడం వల్ల శరీరంలో ఒత్తిడి ప్రతిస్పందన పెరిగి గుండె స్పందన, రక్తపోటులో తాత్కాలిక మార్పులు సంభవించవచ్చని పేర్కొన్నారు. ఇప్పటికే గుండె జబ్బులు, అధిక రక్తపోటు, గుండె స్పందనలో అసమానతలు ఉన్నవారు మరింత జాగ్రత్తగా ఉండాలని సూచించారు.
డీజే స్పీకర్లకు దగ్గరగా ఎక్కువసేపు ఉండటం వల్ల వినికిడి శక్తిపై కూడా ప్రభావం పడే అవకాశం ఉందన్నారు. ఉత్సవాలు, ఊరేగింపులను ఆనందంగా నిర్వహించడంతో పాటు శబ్ద పరిమితులను పాటించాలని కోరారు. వృద్ధులు, చిన్నారులు, గర్భిణులు, అనారోగ్యంతో ఉన్నవారిని అధిక శబ్దం నుంచి రక్షించడం ప్రతి ఒక్కరి బాధ్యత అని డా. శివప్రసాద్ పేర్కొన్నారు.
