పాడేరు కలెక్టరేట్లో ఏసీబీ మెరుపుదాడి రూ.50 వేల లంచం తీసుకుంటూ పట్టుబడ్ డిఆర్ఓ
- పే స్కేల్ క్రమబద్ధీకరణ, పెండింగ్ ఇంక్రిమెంట్ల కోసం లంచం డిమాండ్
- పాడేరు RDO కార్యాలయంలో రెడ్హ్యాండెడ్గా పట్టుకున్న ఏసీబీ
పాడేరు, సెప్టెంబర్ 23, మేజర్ న్యూస్: అల్లూరి సీతారామరాజు జిల్లా పాడేరులో అవినీతి నిరోధక శాఖ (ACB) అధికారులు బుధవారం నిర్వహించిన ఆపరేషన్లో జిల్లా రెవెన్యూ అధికారి (DRO–FAC) మారోతు వెంకట సూర్య లోకేశ్వరరావు రూ.50,000 లంచం తీసుకుంటూ రెడ్హ్యాండెడ్గా పట్టుబడ్డారు.
పాడేరు కలెక్టరేట్లో జూనియర్ అసిస్టెంట్గా పనిచేస్తున్న అమ్ము సూర్య చక్రవర్తికి రెగ్యులర్ పే స్కేల్ క్రమబద్ధీకరణతో పాటు 2024 వరకు పెండింగ్లో ఉన్న వార్షిక ఇంక్రిమెంట్ల మంజూరు కోసం DRO రూ.50,000 లంచం డిమాండ్ చేసినట్లు ఏసీబీ అధికారులు తెలిపారు.
బాధితుడి ఫిర్యాదు మేరకు విశాఖపట్నం రేంజ్ ఏసీబీ అధికారులు రంగంలోకి దిగారు. బుధవారం సాయంత్రం పాడేరు RDO కార్యాలయంలో బాధితుడి నుంచి రూ.50,000 స్వీకరిస్తున్న సమయంలో లోకేశ్వరరావును ఏసీబీ అధికారులు అదుపులోకి తీసుకున్నారు.
లోకేశ్వరరావు 2005లో ఎక్సైజ్ సబ్ఇన్స్పెక్టర్గా ఉద్యోగంలో చేరి అనంతరం రెవెన్యూ శాఖలోకి వచ్చారు. డెప్యూటీ కలెక్టర్, స్పెషల్ డెప్యూటీ కలెక్టర్గా పదోన్నతులు పొందిన ఆయన ప్రస్తుతం DROగా పూర్తి అదనపు బాధ్యతలు నిర్వహిస్తున్నట్లు అధికారులు తెలిపారు.
లంచం అడిగితే 1064కు ఫిర్యాదు
ప్రభుత్వ శాఖల్లో ఎవరైనా లంచం డిమాండ్ చేస్తే ఏసీబీ టోల్ఫ్రీ నంబర్ 1064 లేదా 9440440057కు ఫిర్యాదు చేయాలని అధికారులు ప్రజలకు సూచించారు. ఫిర్యాదు చేసిన వారి వివరాలను గోప్యంగా ఉంచుతామని స్పష్టం చేశారు.
