ఒమన్ తీరంలో వాణిజ్య నౌకపై దాడి: భారత నావికుడు మృతి, మరో 19 మంది రక్షణ
సూర్య జాతీయ డెస్క్: ఒమన్ తూర్పు తీరానికి సమీపంలో వాణిజ్య సరుకు రవాణా నౌక 'ఎంవీ కేప్ దావో'పై జరిగిన దాడిలో ఒక భారత నావికుడు ప్రాణాలు కోల్పోగా, మరో 19 మంది భారత సిబ్బందిని సురక్షితంగా రక్షించారు. భారత్ వైపు ప్రయాణిస్తున్న ఈ యాంటిగ్వా అండ్ బార్బుడా జెండాతో కూడిన నౌకపై ముసందమ్ గవర్నరేట్ తీరానికి సమీపంలో దుండగులు దాడి చేయడంతో నౌక ఇంజిన్ రూమ్లో భారీగా మంటలు చెలరేగాయి. ఈ దాడిని భారత విదేశాంగ మంత్రిత్వ శాఖ (ఎంఈఏ) తీవ్రంగా ఖండించింది. ఈ ప్రాంతంలో వాణిజ్య నౌకలపై నిరంతరం జరుగుతున్న దాడులు తీవ్ర ఆందోళన కలిగిస్తున్నాయని, అమాయక నావికులను, పౌర మౌలిక వసతులను లక్ష్యంగా చేసుకోవడం తక్షణమే ఆగాలని భారత్ గట్టిగా స్పష్టం చేసింది.
నౌకలో మొత్తం 28 మంది సిబ్బంది ఉండగా వారిలో 20 మంది భారతీయ పౌరులే ఉన్నారని అధికారిక వర్గాలు వెల్లడించాయి. ఈ ఘటనలో ఉత్తరప్రదేశ్లోని డియోరియాకు చెందిన సూరజ్ యాదవ్ అనే నావికుడు తీవ్ర గాయాలపాలై మరణించారు. దాడి సమాచారం అందుకున్న వెంటనే రంగంలోకి దిగిన రాయల్ నేవీ ఆఫ్ ఒమన్ సహాయక చర్యలు చేపట్టి మంటలను అదుపు చేయడంతో పాటు మిగిలిన 19 మంది భారతీయులతో సహా మొత్తం 27 మంది సిబ్బందిని సురక్షితంగా ఒడ్డుకు చేర్చింది. బాధితులకు ఒమన్లోని రేవు వద్ద తగిన వైద్య సదుపాయాలు అందిస్తున్నారు. మృతుడి కుటుంబ సభ్యులకు విదేశాంగ శాఖ తీవ్ర సంతాపం తెలియజేసింది.
మస్కట్లోని భారత రాయబార కార్యాలయం అక్కడి ఒమన్ ఉన్నతాధికారులతో నిరంతరం సమన్వయం చేసుకుంటూ పరిస్థితిని పర్యవేక్షిస్తోందని, రక్షించబడిన 19 మంది భారత నావికులను స్వదేశానికి త్వరగా రప్పించేందుకు అన్ని చర్యలు తీసుకుంటున్నామని విదేశాంగ శాఖ తెలిపింది. మధ్యప్రాచ్య సముద్ర జలాల్లో వాణిజ్య రవాణా స్వేచ్ఛను పునరుద్ధరించాలని, ఉద్రిక్తతలను తగ్గించి శాంతి స్థాపనకు దౌత్యం, చర్చల మార్గమే సరైన పరిష్కారమని న్యూఢిల్లీ పునరుద్ఘాటించింది. ఈ ప్రాంతంలో నౌకలపై జరుగుతున్న దాడుల వల్ల అమాయక కార్మికుల ప్రాణాలకు ముప్పు వాటిల్లుతోందని ఆందోళన వ్యక్తం చేస్తూ భారత నావికులకు పూర్తి రక్షణ కల్పించాలని నావికా సంఘాలు డిమాండ్ చేస్తున్నాయి.
